Rossiyada naqd rubl va oltin olib chiqishga cheklovlar joriy etildi
1-apreldan boshlab barcha toifadagi shaxslar olib chiqilayotgan mablag‘larning kelib chiqishini bank hujjatlari bilan tasdiqlashi kerak bo‘ladi.
Rossiya prezidenti Vladimir Putin 25-mart kuni mamlakatdan naqd pul va oltin olib chiqishni tartibga soluvchi yangi farmonni imzoladi.
Hujjatga ko‘ra, bir qator cheklovlar 2026-yil 1-apreldan kuchga kiradi.
Yangi tartibga binoan, jismoniy shaxslar Yevrosiyo iqtisodiy ittifoqi (YII)ga a’zo davlatlar — Armaniston, Belarus, Qozog‘iston va Qirg‘izistonga 100 ming AQSh dollaridan ortiq qiymatdagi naqd rublni olib chiqolmaydi.
Shu bilan birga, yuridik shaxslar va yakka tartibdagi tadbirkorlar uchun naqd pulni temiryo‘l yoki avtomobilda olib chiqish to‘liq taqiqlanadi. Ular bunday operatsiyalarni faqat xalqaro aeroportlar orqali amalga oshirishi mumkin bo‘ladi.
Farmonga muvofiq, 1-apreldan boshlab barcha toifadagi shaxslar olib chiqilayotgan mablag‘larning kelib chiqishini bank hujjatlari bilan tasdiqlashi, shuningdek, xorijda undan qanday maqsadda foydalanilishini ko‘rsatgan holda deklaratsiya topshirishi shart etib belgilandi.
Bundan tashqari, hujjat bilan oltin olib chiqish bo‘yicha ham cheklovlar joriy etildi. Xususan, 2026-yil 1-maydan boshlab og‘irligi 100 grammdan ortiq bo‘lgan oltin quymalarini olib chiqish tartibi qat’iylashtiriladi.
Yuridik shaxslar va tadbirkorlar bunday quymalarni YII davlatlariga faqat Rossiya Asillik palatasining maxsus ruxsatnomasi asosida hamda Sheremetyevo, Domodedovo, Vnukovo va Knevichi xalqaro aeroportlari orqali olib chiqishi mumkin bo‘ladi.
Jismoniy shaxslar uchun esa oltin olib chiqish bo‘yicha yangi talablar nafaqat YII mamlakatlariga, balki boshqa xorijiy davlatlarga nisbatan ham amal qiladi.
