Rossiyaning dron hujumlari oqibatida Ukrainada ikki kishi halok bo‘ldi
Dunay daryosi bo‘yidagi Izmail portiga zarba berilib, port inshootlari va energetika infratuzilmasiga zarar yetkazildi.
Rossiya hujumlari Ukrainaning shimoli-sharqidagi Xarkov shahrida va uning atrofida ikki kishining halok bo‘lishiga sabab bo‘ldi. Bu haqda rasmiylarga tayanib Reuters xabar bermoqda.
Ma’lum qilinishicha, Dunay daryosi bo‘yidagi Izmail portiga ham zarba berilgan bo‘lib, natijada port inshootlari va energetika infratuzilmasiga zarar yetgan.
Xarkov viloyati prokuraturasi payshanba kuni erta tongda Telegram’da e’lon qilgan bayonotida, Xarkov shahriga qilingan hujumda jarohatlangan ayol shifoxonada vafot etganini ma’lum qildi.
Xabarga ko'ra, Rossiya kuchlari tez-tez nishonga oladigan, chegaradan 30 km uzoqlikda joylashgan shaharning ikki tumaniga uyushtirilgan zarbalar natijasida yana to‘qqiz kishi jarohatlangan.
Prokuratura, shuningdek, chegaraga yaqinroq hududda Rossiyaning dron hujumi oqibatida mashinasida bo‘lgan erkak ham halok bo‘lganini bildirdi.
Rossiyaning Belgorod viloyati gubernatori Vyacheslav Gladkovning aytishicha, Ukrainaning dron hujjumlari oqibatida chegaraga yaqin qishloqda mototsiklda ketayotgan 18 yoshli yigit hamda Grayvoron shahrida mashinasidagi ayol vafot etgan.
Moskva shahar meri Sergey Sobyanin esa chorshanba kuni davomida poytaxt tomon uchib kelayotgan 17 ta Ukraina droni yo‘lda tutib olinib, yo‘q qilinganini aytdi.
