1-apreldan haydovchilarning jarima ballari kamera orqali ham hisoblanadi
Shuningdek, yangi tartibga binoan jarima ballarini taqsimlash mexanizmi joriy etilmoqda.
2026 yil 1 apreldan yo‘l qoidabuzarliklari uchun jarima ballari mavjud avtomatlashtirilgan foto va video qayd etish tizimlari orqali aniqlangan holatlarda ham hisoblanadi. Bu haqda Vazirlar mahkamasining tegishli qarorida ma’lum qilindi.
Yangi tartibga ko‘ra, yo‘l harakati qoidalarini buzish holatlari endilikda faqat Yo‘l harakati xavfsizligi (YHX) xodimlari tomonidan emas, balki yo‘lga o‘rnatilgan kamera tizimlari orqali qayd etilgan taqdirda ham jarima ballariga ta’sir qiladi. Bu esa haydovchilar mas’uliyatini oshirish va qoidabuzarliklarni kamaytirishga qaratilgan.
Shuningdek, yangi qoidaga binoan jarima ballarini taqsimlash mexanizmi joriy etilmoqda. Agar transport vositasini mulkdori emas, balki boshqa shaxs ishonchnoma, sug‘urta polisi yoki yo‘l varaqasi asosida boshqargan bo‘lsa, jarima ballari aynan qoidabuzarlikni sodir etgan haydovchiga yuklanadi.
Mazkur o‘zgarishlar yo‘llarda intizomni mustahkamlash, adolatli javobgarlikni ta’minlash va qoidabuzarliklar sonini kamaytirishga xizmat qiladi.
