AQShga borgan Rossiya deputatlariga Tramp tasviri tushirilgan paypoqlar sovg‘a qilindi
Tashrif AQSh Kongressi a’zosi Anna Paulina Lunaning taklifiga binoan amalga oshirilmoqda.
Rossiya parlament delegatsiyasi va AQSh kongressi a’zolari o‘zaro ramziy sovg‘alar almashdi. Bu haqda TASS agentligi xabar bermoqda.
Ma’lum qilinishicha, sovg‘alar qatorida AQSh prezidenti Donald Trampning tasviri tushirilgan paypoqlar hamda sovet-amerika kosmik dasturi “Soyuz – Apollon”ga bag‘ishlangan esdalik otkritkasi ham bo‘lgan.
Rossiya Dumasi delegatsiyasi a’zosi, iqtisodiy siyosat bo‘yicha komitet raisi o‘rinbosari Mixayil Delyagining so‘zlariga ko‘ra, dastlab AQSh tomoni sovg‘a berilishini rad qilishni so‘ragan. Biroq delegatsiya kelganida bu qaror o‘zgargan va AQSh kongressmenlari Tramp tasviri tushirilgan paypoqlar hamda kongressmen Anna Paulina Luniyaning shaxsiy jetonini sovg‘a qilishgan.
"Biz elchixonadan kamtarona sovg‘alarni (etikaga muvofiq) taqdim etdik, shuningdek, spiker o‘rinbosari Boris Chernishev amerikaliklarni xursand qilgan Soyuz-Apollon reysi ishtirokchilari tomonidan imzolangan otkritkani taqdim etdi", — deya ta’kidladi agentlik manbasi.
Tashrif AQSh Kongressi a’zosi Anna Paulina Lunaning taklifiga binoan amalga oshmoqda. Deputatlar amerikalik qonun chiqaruvchilar bilan muloqot olib boradi.
