Avstraliya eronlik sayyohlar uchun kirishni vaqtincha taqiqladi
Cheklov 26-martdan kuchga kirgan bo‘lib, taxminan 6 800 nafar viza egasiga ta’sir ko‘rsatadi.
Avstraliya hukumati amaldagi vizaga ega bo‘lgan Eron fuqarolarining mamlakatga kirishini 6 oy muddatga vaqtincha taqiqladi. Bu haqda mamlakat ichki ishlar vaziri Toni Burk bayonotiga tayanib BBC xabar berdi.
Mazkur qaror rasmiylarga ko‘ra, ayrim eronlik sayyohlar viza muddati tugagach mamlakatni tark etmasligi yoki qaytib keta olmasligi ehtimoli bilan izohlangan. Vazirning ta’kidlashicha, Avstraliyada doimiy qolish hukumat tomonidan nazorat qilinadigan ongli siyosiy qaror bo‘lishi kerak.
Cheklov 26-martdan kuchga kirgan bo‘lib, taxminan 6 800 nafar viza egasiga ta’sir ko‘rsatadi. Shu bilan birga, ayrim istisnolar ham mavjud:
— Avstraliya fuqarolarining turmush o‘rtoqlari va farzandlariga kirishga ruxsat beriladi;
— Fuqarolarning ota-onalari uchun “hamdardlik asosida” alohida ko‘rib chiqish mumkin.
Qayd etilishicha, ushbu choralar faqat Eron fuqarolariga nisbatan qo‘llanmoqda va boshqa davlatlarga tatbiq etilmaydi. Qonun loyihasi mart oyi boshida, Eron ayollar futbol delegatsiyasining ayrim a’zolariga gumanitar vizalar berilganidan so‘ng ilgari surilgan.
Qaror Avstraliya ichida tanqidlarga sabab bo‘ldi. “Boshpana izlovchilar resurs markazi” vakillari va siyosatchilar, jumladan Yashillar partiyasi senatori Devid Shubrij ushbu taqiqni inson huquqlariga zid choralar sifatida baholadi.
Tanqidchilar fikricha, bu qaror Avstraliya hukumatining Eron aholisi xavfsizligini qo‘llab-quvvatlash borasidagi bayonotlariga zid keladi.
