Epshteyn ishi bo‘yicha jabrlanuvchilar AQSh Adliya vazirligi va Google’ni sudga berdi
Ular hukumatni shaxsiy ma’lumotlarni oshkor qilish orqali jabrlanuvchilarning xavfsizligiga zarar yetkazganlikda ayblamoqda.
Moliyachi Jeffri Epshteyn ishi bilan bog‘liq bir guruh jabrlanuvchilar AQSh Adliya vazirligi hamda Google kompaniyasiga qarshi jamoaviy sud da’vosi kiritdi. Bu haqda NBC News xabar bermoqda.
Da’vo arizasida ta’kidlanishicha, hukumat Epshteyn ishi bo‘yicha hujjatlarni oshkor qilish jarayonida jabrlanuvchilarning shaxsiy hayoti va xavfsizligini yetarli darajada himoya qilmagan. Aksincha, tezkor va keng ko‘lamli oshkor qilish siyosati ustuvor vazifa sifatida qo‘yilgan.
Sud hujjatlariga ko‘ra, AQSh Adliya vazirligi taxminan 100 nafar jabrlanuvchining shaxsiy ma’lumotlarini ochiq manbalarda e’lon qilib, ularning shaxsini oshkor qilgan. Keyinchalik ushbu ma’lumotlar rasmiy yozuvlardan olib tashlangan bo‘lsa-da, jabrlanuvchilar internet platformalari, xususan Google qidiruv tizimi orqali bu ma’lumotlar qayta tarqalishda davom etayotganini bildirgan.
Da’vogarlarning ta’kidlashicha, shaxsiy ma’lumotlar qidiruv natijalarida hamda sun’iy intellekt tomonidan yaratilgan kontentda hamon ko‘rinmoqda. Natijada jabrlanuvchilar yana psixologik bosim va tahdidlarga duch kelmoqda: ularga noma’lum shaxslar tomonidan qo‘ng‘iroqlar qilinmoqda, elektron xatlar yuborilmoqda va ayrim hollarda jismoniy xavfsizligiga tahdidlar bildirilmoqda.
Jabrlanuvchilar suddan AQSh Adliya vazirligidan har biri uchun kamida 1000 dollar miqdorida kompensatsiya undirishni so‘ramoqda. Shuningdek, Google kompaniyasidan shaxsiy ma’lumotlarni darhol va to‘liq o‘chirish hamda yetarli miqdorda jarima tovon puli undirilishini talab qilmoqda.
Ma’lumot uchun, Jeffri Epshteyn 2019-yil iyul oyida AQShda voyaga yetmagan qizlarni jinsiy ekspluatatsiya qilishda ayblanib hibsga olingan edi. Unga qarshi jinoiy ish 2019-yil 10-avgust kuni qamoqxonada vafot etganidan so‘ng yopilgan.
