O‘zbekistonda jurnalist va blogerlar uchun “Media haftalik” ta’limiy loyihasi start oldi
Loyiha respublika bo‘ylab qariyb 12,5 ming ishtirokchini qamrab oladi.
O‘zbekistonda jurnalistlar, blogerlar va matbuot kotiblari uchun mo‘ljallangan yirik ta’limiy-amaliy loyiha — “Media haftalik” boshlandi. Kontent markazi tomonidan hamkor tashkilotlar bilan birgalikda tashkil etilayotgan loyiha zamonaviy media muhitidagi tezkor o‘zgarishlar, ijtimoiy tarmoqlar va sun’iy intellekt rivoji, shuningdek, feyk xabarlar oqimi sharoitida soha vakillarining kasbiy ko‘nikmalarini mustahkamlashga qaratilgan.
Mazkur loyiha respublika bo‘ylab 12,5 mingga yaqin ishtirokchini qamrab olishi kutilmoqda. Dastur doirasida joriy yilning 30-martidan 26-iyuniga qadar barcha hududlarda 5 kunlik intensiv o‘quv-seminarlar va mahorat darslari o‘tkaziladi.
Treninglar davomida mamlakatning yetakchi media ekspertlari, muharrirlar va prodyuserlar ishtirokida kontent yaratish, faktcheking, raqamli gigiyena, SMM, strategik kommunikatsiyalar kabi dolzarb yo‘nalishlar bo‘yicha nazariy va amaliy mashg‘ulotlar tashkil etiladi. Mashg‘ulotlar telejurnalistlar, bosma nashr vakillari, blogerlar hamda davlat idoralari matbuot kotiblari uchun alohida yo‘nalishlarda olib boriladi.
O‘quv mashg‘ulotlarida ishtirokchilar real media keyslar asosida ishlash, professional xatolarni tahlil qilish hamda zamonaviy media yondashuvlarini o‘rganish imkoniyatiga ega bo‘ladi.
Treninglar yakunida qatnashchilarga maxsus sertifikatlar topshiriladi.
Media-estafetaning ilk bosqichi 30-mart kuni Qoraqalpog‘iston Respublikasida boshlanadi. Har bir hududdagi o‘quv dasturi yakunida soha vakillarini birlashtiruvchi yirik Media forum tashkil etilishi rejalashtirilgan.
Loyihada ishtirok etish istagida bo‘lgan nomzodlar Yoshlar ishlari agentligining hududiy boshqarma va bo‘limlariga murojaat qilishlari mumkin.
Hududlar kesimida “Media haftalik” o‘tkazilish sanalari:
30-mart – 3-aprel: Qoraqalpog‘iston Respublikasi
6-aprel – 10-aprel: Xorazm viloyati
13-aprel – 17-aprel: Surxondaryo viloyati
20-aprel – 24-aprel: Qashqadaryo viloyati
27-aprel – 1-may: Samarqand viloyati
4-may – 8-may: Navoiy viloyati
11-may – 15-may: Buxoro viloyati
18-may – 22-may: Farg‘ona viloyati
25-may – 29-may: Namangan viloyati
1-iyun – 5-iyun: Andijon viloyati
8-iyun – 12-iyun: Jizzax viloyati
15-iyun – 19-iyun: Sirdaryo viloyati
22-iyun – 26-iyun: Toshkent viloyati va Toshkent shahri
