Pokiston Afg‘onistondagi harbiy operatsiyalarini qayta boshladi

Pokiston hukumati Afg'oniston hududida harbiy operatsiyalar qayta boshlanganini e’lon qildi. Bu haqda Pokiston Tashqi ishlar vazirligi 26-mart kuni bergan bayonotida ma’lum qildi deydi Reuters.

 

Rasmiylarga ko‘ra, Ramazon hayiti munosabati bilan e’lon qilingan vaqtinchalik sulh muddati yakunlangan va uzoq muddatli kelishuvga erishish bo‘yicha urinishlar natija bermagan. Shu sababli harbiy harakatlar yana davom ettirilmoqda.

 

Pokiston Tashqi ishlar vazirligi vakili Tohir Andrabiyning ta’kidlashicha, operatsiyalar belgilangan strategik maqsadlarga erishilgunga qadar davom etadi.

So‘nggi voqealar qo‘shni davlatlar o‘rtasidagi munosabatlarning keskinlashganini ko‘rsatmoqda.

Mojaroning faol bosqichi o‘tgan oy boshlangan bo‘lib, to‘qnashuvlar ikki tomon uchun ham jiddiy yo‘qotishlarga sabab bo‘lgani aytilmoqda.

 

Kobul rasmiylarining ma’lum qilishicha, 16-mart kuni Pokiston tomonidan amalga oshirilgan havo zarbasi natijasida poytaxt Kobuldagi reabilitatsiya markazida 400 dan ortiq kishi halok bo‘lgan. Islomobod esa bu ayblovlarni rad etib, zarbalar faqat terrorchi guruhlar bilan bog‘liq harbiy obyektlar va infratuzilmaga qaratilganini bildirmoqda.

 

Pokiston tomoni Tolibon nazoratidagi Afg‘oniston ma’muriyatini o‘z hududida faoliyat yuritayotgan qurolli guruhlarni himoya qilish va qo‘llab-quvvatlashda ayblamoqda. Kobul esa bunday da’volarni rad etib, mazkur muammo Pokistonning ichki xavfsizlik masalasi ekanini ta’kidlamoqda.

 

Avvalroq Turkiya, Qatar va Saudiya Arabistoni vositachiligida erishilgan sulh 24-mart kuni tugagan edi. Islomobod rasmiylari Afg‘oniston tomoni xavfsizlik siyosatini qayta ko‘rib chiqmaguncha harbiy operatsiyalar davom etishini bildirgan.