Putin tadbirkorlarni urushni ixtiyoriy moliyalashtirishga chaqirdi — The Bell
Ukrainaga qarshi urushga mablag‘ ajratish tashabbusi “Rosneft” rahbari Igor Sechin tomonidan ilgari surilgani aytilmoqda.
Rossiya prezidenti Vladimir Putin yirik biznes vakillari bilan o‘tkazilgan yopiq uchrashuvda urushni davom ettirish va uni moliyalashtirish masalalarini muhokama qildi. Bu haqda manbalariga tayanib, The Bell xabar berdi.
Ma’lum qilinishicha, uchrashuv Rossiya sanoatchilar va tadbirkorlar ittifoqi qurultoyidan so‘ng bo‘lib o‘tgan. Oddiy hollarda bunday muloqotlar mazmuni oshkor etilmaydi, so‘nggi yillarda esa ishtirokchilar ro‘yxati ham maxfiylashtirilgan.
Manbalarga ko‘ra, Putin uchrashuvda urushni davom ettirish rejalari haqida gapirgan. Xususan, u “urushni davom ettiramiz” va “Donbass chegaralarigacha boramiz” mazmunida fikr bildirgani aytilmoqda.
Shundan so‘ng prezident biznes vakillariga davlat byudjetiga ixtiyoriy badallar kiritishni taklif qilgan. Manbalardan biriga ko‘ra, bunday tashabbus “Rosneft” rahbari Igor Sechin tomonidan ilgari surilgan bo‘lib, Sechin bu haqda bir kun avval Putinga maktub yo‘llagan. Mablag‘ jalb qilish vositasi sifatida harbiy obligatsiyalar chiqarish taklif etilgan.
Ayrim biznesmenlar uchrashuvning o‘zidayoq tashabbusni qo‘llab-quvvatlagan. Xususan, Suleymon Kerimov 100 milliard rubl ajratishga va’da bergani aytilmoqda. Yana kamida bir yirik tadbirkor ushbu g‘oyani qo‘llab-quvvatlagan, ammo mablag‘ miqdorini ochiqlamagan.
