Toshkent viloyatida ayol kishi bo‘lgani uchun bir fuqaro ishga olinmadi
Ayol ombudsmanga murojaat qilgach, uning mehnat huquqlari tiklandi.
Toshkent viloyatida ishga qabul qilish jarayonida jinsiga ko‘ra kamsitishga duch kelgan ayolning mehnat huquqlari tiklandi. Bu haqda Oliy Majlisning Inson huquqlari bo‘yicha vakili (ombudsman) xabar berdi.
Ma’lum qilinishicha, fuqaro A.Y. 2026-yil yanvar oyida iqtisodiy sohadagi tashkilotlardan biriga ishga joylashish uchun suhbatdan o‘tgan, ariza topshirgan va elektron shartnomani imzolagan. Shundan so‘ng uni ishga qabul qilish bo‘yicha buyruq chiqishi kutilgan.
Biroq keyinchalik unga ushbu lavozimga ayol kishi qabul qilinmasligi bildirilgan. Murojaatchi bu qaror uning malakasi yoki ish tajribasi bilan emas, balki jinsi bilan bog‘liq bo‘lganini ta’kidlagan.
Xabarga ko‘ra, holat Konstitutsiyada belgilangan tenglik tamoyillari hamda kamsitishlarsiz mehnat qilish huquqiga zid hisoblanadi. Mazkur murojaat nazoratga olinib, Ombudsmanning hududiy vakili va Davlat mehnat inspeksiyasi xodimlari ishtirokida o‘rganildi.
O‘rganishlar natijasida fuqaroning mehnat huquqlari tiklanib, u tegishli lavozimga ishga qabul qilindi.
Ombudsman ish beruvchilarni nomzodlarni jinsiga qarab emas, balki ularning kasbiy malakasi va salohiyatiga qarab baholashga chaqirdi.
