Toshkentda yangi sanoat zonalarini tashkil etishga moratoriy joriy etiladi

O‘zbekistonda atmosfera havosi sifatini yaxshilashga qaratilgan “Toza havo” milliy loyihasini amalga oshirish chora-tadbirlari to‘g‘risidagi prezident farmoni qabul qilindi. Bu haqda Ekologiya qoʻmitasi matbuot xizmati xabar berdi.

 

Hujjatga muvofiq, 2026–2030-yillarda atmosfera havosining sifatini yaxshilash bo‘yicha qator ustuvor vazifalar belgilandi. Xususan, atmosferaga chiqariladigan ifloslantiruvchi moddalar hajmini 10,5 foizga kamaytirish, transport vositalaridan chiqayotgan zararli moddalar miqdorini 10 foizga qisqartirish, shuningdek, PM2.5 zarrachalari me’yoridan oshib ketadigan kunlar sonini kamaytirish ko‘zda tutilgan.

 

Shuningdek, atrof-muhitga ta’sir darajasi bo‘yicha I va II toifadagi sanoat korxonalarida avtomatik monitoring stansiyalari hamda chang va gazni tozalash uskunalarini o‘rnatish majburiy etib belgilanadi. Bu orqali sanoat korxonalaridan chiqayotgan zararli chiqindilar ustidan nazoratni kuchaytirish rejalashtirilgan.

 

Farmonga ko‘ra, 2026-yil 1-apreldan boshlab Toshkent shahrida yangi sanoat zonalarini tashkil etishga noma’lum muddatga moratoriy joriy etiladi. Mazkur cheklov xizmat ko‘rsatish yoki moliyaviy xizmatlarga asoslangan zonalarga tatbiq etilmaydi.

 

Bundan tashqari, Toshkent shahridagi ekologik vaziyatni yaxshilash bo‘yicha faoliyat yuritayotgan maxsus komissiya vakolatlari 2027-yil 1-martgacha uzaytirildi. Komissiya bundan buyon “Atrof-muhit holatini yaxshilash bo‘yicha shoshilinch chora-tadbirlarni amalga oshirish bo‘yicha Respublika maxsus komissiyasi” nomi bilan faoliyat yuritadi.

 

“Toza havo” milliy loyihasi bosqichma-bosqich hududlarda joriy etiladi. Jumladan, 2026-yil 1-iyulgacha Farg‘ona viloyati, Andijon viloyati va Namangan viloyatida; 1-avgustgacha Toshkent viloyati, Sirdaryo viloyati, Jizzax viloyati hamda Samarqand viloyatida; 1-oktabrgacha Qashqadaryo viloyati, Surxondaryo viloyati, Navoiy viloyati va Buxoro viloyatida; 1-dekabrgacha esa Qoraqalpog‘iston Respublikasi va Xorazm viloyatida amalga oshiriladi.

 

Bundan tashqari, sanoat korxonalarida chang va gazni tozalash, energiya tejamkor uskunalar o‘rnatish, avtomatik monitoring tizimlarini joriy etish hamda yashil texnologiyalarni keng qo‘llashga alohida e’tibor qaratiladi. Tijorat banklari ushbu uskunalarni xarid qilish uchun imtiyozli kreditlar ajratishi belgilangan.