Andijonda xonadonida qalbaki dori vositalari ishlab chiqargan shaxslar ushlandi

Andijonda yashash xonadonida dori vositalarini noqonuniy ishlab chiqarishni yo‘lga qo‘ygan fuqarolar qo‘lga olindi. Bu haqda Bojxona qo‘mitasi xabar berdi.

 

Ma’lum qilinishicha, Andijon va Asaka shaharlari hamda Asaka tumanida o‘tkazilgan tezkor tadbirlarda shubha ostiga olingan 3 nafar shaxslarning o‘zaro kelishib, yashash xonadonlarida dori vositalarini ishlab chiqarishga mo‘ljallangan yashirin laboratoriya va sexlar tashkil qilgani aniqlandi.

 

Xonadonlarni ko‘zdan kechirish davomida qalbaki dori vositalari, ularni ishlab chiqarish uchun uskunalar, bo‘sh flakonlar, etiketkalar, yo‘riqnomalar, dori qadoqlashda foydalaniladigan anjomlar, turli muhrlar va boshqa anjomlar topilgan.

 

Dastlabki tahlillarga ko‘ra, qo‘lbola tarzda dori vositalarini ishlab chiqarishga mo‘ljallangan yashirin sexlardan qiymati 1 mlrd 250 mln so‘mlik 4 dona uskuna, 6 dona muhr, 4 turdagi 214 ming dona bo‘sh flakon va idishlar,  turli etiketka va yo‘riqnomalar, ularni qadoqlashga xizmat qiluvchi anjomlar ashyoviy dalil sifatida olingan.

 

Shuningdek, 163 xil turdagi 286 ming 676 dona sifati kafolatlanmagan dori vositalari musodara qilingan.

 

Olib qo‘yilgan “Tivortin”, “Layboten”, “Revarton”, “Diprospan”, “Riyabolel” “Sefazolin”, “Streptomitsin” “Ampsillin” kabi qo‘lbola dori vositalarining asl nusxalari qiymati farmatsevtika bozorida o‘rtacha 10 mlrd. so‘mni tashkil qiladi.

 

Qayd etilishicha, qalbaki mahsulotlar muomalaga kirganida, intellektual mulk egalariga iqtisodiy zarar yetib, 200 mingdan ortiq bemorlarning salomatligiga jiddiy xavf tug‘ilar edi.