AQSh bo‘ylab Trampga qarshi namoyishlar bo'lib o'tadi

AQSh bo‘ylab prezident Donald Tramp va uning ma’muriyatiga qarshi “No Kings” (“Qirollarga yo‘q”) namoyishlari o‘tkaziladi. Bu haqda Reuters xabar bermoqda.

 

Tashkilotchilarning ma’lumotiga ko‘ra, barcha 50 ta shtatda 3,200 dan ortiq namoyishlar rejalashtirilgan bo‘lib, bu tarixdagi eng yirik bir kunlik tinch namoyish bo‘lishi mumkin.

 

Asosiy mitinglar Nyu-York, Los-Anjeles, Vashington va Minnesota shtatining Minneapolis-Sent Pol hududida o‘tkaziladi, ammo ishtirokchilarning uchdan ikki qismi yirik shahar markazlaridan tashqaridan kelishi kutilmoqda. Indivisible guruhi rahbari Lih Grinbergning so‘zlariga ko‘ra, harakatning muvaffaqiyati faqat ishtirokchilar sonida emas, balki ular qayerda namoyish qilayotganida ham namoyon bo‘ladi. Chunki Aydaho, Vayoming, Montana va Yuta kabi respublikachi shtatlarda tadbirlarni tashkil qilayotgan va ishtirok etishga ro‘yxatdan o‘tgan odamlar soni oshgan.

 

Namoyishlar AQSh va Isroil tomonidan Eronni bombardimon qilishga qarshi chaqiriq sifatida o‘tkazilmoqda. 

 

ACLU rahbari Dirdre Shifelingning aytishicha, prezident Trampning hokimiyatni suiiste’mol qilishiga qarshi namoyishlar amalda natija beradi va ularni orqaga chekinishga majbur qiladi.

 

Oq uy vakili Ebigeyl Jekson esa mitinglarni “Trampni yoqtirmaydiganlar”ning asabiy reaksiyasi deb atab, faqat jurnalistlar uchun qiziq ekanini bildirdi.