Avstraliya osmoni qizil tusga kirdi

G‘arbiy Avstraliyaning shimoli-g‘arbiy hududlarida kuzatilayotgan kuchli tropik “Narell” sikloni zaiflashayotganiga qaramay, jiddiy talafotlar keltirib chiqarmoqda. Mutasaddilar ekstremal ob-havo sharoiti hali yakunlanmaganini ma’lum qilmoqda.

 

Siklon Eksmaus shahrida keng ko‘lamli zarar yetkazgan. Mahalliy aholi tun davomida boshpanalarda qolishga majbur bo‘lgan. Ayni paytda tabiiy ofat shtatning Mid-Vest hududi tomon ichkariga siljimoqda.

 

Meteorologiya byurosi ma’lumotlariga ko‘ra, Gazkoyn va Mid-Vest qirg‘oq hududlarining katta qismi xavf ostida qolmoqda. Siklon kuchsizlanayotganiga qaramay, Denamgacha bo‘lgan hududlarga sezilarli zarar berishi mumkin.

 

Prognozlarga ko‘ra, hududda kuchli shamol, jala yomg‘ir hamda Onslou va Denam oralig‘idagi qariyb 800 kilometrli qirg‘oq chizig‘ida xavfli suv ko‘tarilishi ehtimoli mavjud.

 

Infratuzilma jiddiy zarar ko‘rdi

 

Siklon Eksmaus hududidan o‘tishi vaqtida shamol tezligi soatiga 250 kilometrgacha yetgan. Natijada ayrim binolarning tomlari uchib ketgan, elektr va suv ta’minoti uzilgan. Shahardagi evakuatsiya markazining ham tom qismi shikastlangan. U yerda 40 ga yaqin aholi vaqtinchalik boshpana olgani taxmin qilinmoqda.

 

Shimolda joylashgan Onslou shahrida esa ko‘chalar suv ostida qolgan, uy-joylarga suv kirgani haqida xabarlar bor. Rasmiylarga ko‘ra, hozircha jabrlanganlar haqida ma’lumot kelib tushmagan.

 

Favqulodda vaziyat sabab hududdagi yo‘llar yopilgan, aviaqatnovlar to‘xtatilgan, maktablar faoliyati vaqtincha to‘xtatilgan va kon korxonalaridagi ishchilar evakuatsiya qilingan.

 

Suv ta’minotida uzilishlar kuzatilmoqda

 

Eksmaus va Onslou aholisi zarur bo‘lmagan suv iste’molini cheklashga chaqirilgan. Elektr ta’minotidagi uzilishlar sabab Ekmausda suv bosimi pasayishi va uzilishlar kuzatilishi mumkin.

 

Onslouda esa suv quvurlariga yetgan zarar tufayli ta’mirlash ishlari olib borilmoqda, bu esa yirik suv zaxiralariga ta’sir ko‘rsatmoqda.

 

Mutaxassislar vaziyatni murakkab deb baholamoqda, biroq ta’mirlash ishlari tezkorlik bilan olib borilayotgani qayd etildi.

 

Siklon keng hududlarga yoyilishi mumkin

 

Rasmiylar siklon ta’siri Perz shahri va janubi-g‘arbiy hududlargacha yetib borishi mumkinligini bildirmoqda. Ushbu hududlarda yaqin kunlarda kuchli yomg‘ir yog‘ishi kutilmoqda.

 

Mutaxassislar hisob-kitobiga ko‘ra, yog‘ingarchilik miqdori 50 millimetrdan oshishi mumkin, biroq kuchli shamollar ehtimoli nisbatan past.

 

Shu bilan birga, Kalbarri va Geraldton hududlarida kuchli shamol kuzatilishi mumkin, eng katta xavf esa ichki hududlarga to‘g‘ri kelishi prognoz qilinmoqda.