Eron bilan urush bir necha haftada yakunlanishi mumkin — AQSh davlat kotibi
Marko Rubio ikki nafar eronlik amaldor AQSh bilan muzokara o‘tkazishga tayyor ekanini bildirgan.
AQSh Senatori va yuqori lavozimli rasmiylardan biri Marko Rubio juma kuni G7 davlatlari tashqi ishlar vazirlariga Eron bilan urush yana ikki- to‘rt hafta davom etishi mumkinligini bildirgan. Bu haqda bevosita xabardor uch manba Axios nashriga ma’lum qilgan.
Rubio Fransiyada bo‘lib o‘tgan uchrashuvda AQSh Eron bilan jiddiy muzokaralarga yaqin ekanini ta’kidlagan. Shu bilan birga, mintaqaga qo‘shimcha minglab qo‘shinlar yuborilayotgani va ma’muriyat quruqlikdagi kuchlarni ham o‘z ichiga olishi mumkin bo‘lgan keskin variantlarini ko‘rib chiqayotganini bildirgan.
Kotib urushdagi barcha maqsadlariga erishishga qat’iy bel bog‘laganini aytgan. U G7dagi hamkasblariga AQSh Eron bilan hozircha bevosita emas, vositachilar orqali aloqada ekanini ma’lum qilgan. Manbalarga ko‘ra, Tehronda qarorlar kim tomonidan qabul qilinayotgani borasida noaniqlik mavjud.
Shuningdek, Rubio ikki nafar eronlik amaldor AQSh bilan muzokara o‘tkazishga tayyorligini bildirgan, ammo ular yuqori rahbariyatning roziligini olishi kerakligini qo‘shimcha qilgan. Vositachilarning xavfsizlik yuzasidan telefonlardan foydalanmayotgani sababli aloqa jarayoni sekinlashmoqda.
Rubio AQShning Ho‘rmuz bo‘g‘ozini qayta ochishda G7 mamlakatlarining yordamiga ehtiyoji yo‘qligini, ammo urush tugaganidan keyin bo‘g‘ozni nazorat qilish uchun ittifoqchilari dengiz kuchlariga qo‘shilishini istashini ta’kidlagan.
“Rubio AQShga keyingi bosqichda kemalarni kuzatish yoki Ho‘rmuz bog‘ozida xalqaro ishtirokni ta’minlash uchun ittifoqchilar kerak bo‘lishini aytdi. Bu eronliklarga bo‘g‘oz ustidan nazorat ularda emasligini ko‘rsatadi. Barchasi bunga rozi bo‘ldi”, — degan manba.
G7 uchrashuvidan keyingi brifingda Rubio urush “oylar emas, balki haftalar ichida” yakunlanishini kutayotganini bildirgan. Ehtimoliy tinchlik muzokaralarida Eron tomondan kim vakillik qilishi borasida aniqlik kutilmoqda.
Agar muzokaralar bo‘lsa, AQSh delegatsiyasiga vitse-prezident Jey Di Vens rahbarlik qilishi mumkin. Shu bilan birga, Donald Tramp diplomatik jarayonda Marko Rubio, Stiv Uitkoff va Jared Kushner ishtirok etayotganini aytgan.
Rubio urushdan keyin ittifoqchilar Ho‘rmuz bog‘ozida harakatlanish erkinligini ta’minlashda faolroq bo‘lishi lozimligini, chunki Eron bu hududdan o‘tadigan kemalardan to‘lov undirishni rejalashtirayotganini bildirgan.
