Pokistonda Yaqin Sharqdagi vaziyat bo‘yicha muzokaralar o‘tkaziladi
29-30-mart kunlari Saudiya Arabistoni, Turkiya va Misr tashqi ishlar vazirlari Islomobodga tashrif buyuradi.
Pokiston yakshanba kuni Saudiya Arabistoni, Turkiya va Misr tashqi ishlar vazirlarini Yaqin Sharqdagi urush bo‘yicha muzokaralar uchun qabul qiladi. Bu haqda Pokiston tashqi ishlar vazirligiga tayanib Arab News xabar berdi.
Ma’lumotlarga ko‘ra, Saudiya Arabistoni tashqi ishlar vaziri shahzoda Faysal bin Farxon, Turkiya tashqi ishlar vaziri Hakan Fidan va Misr tashqi ishlar vaziri doktor Badr Abdullatti 29-30-mart kunlari Pokistonlik hamkasbi Ishoq Darning taklifiga binoan Islomobodga tashrif buyuradi.
Pokiston tashqi ishlar vazirligi bayonotida aytilishicha, tashrif davomida tashqi ishlar vazirlari mintaqadagi keskinlikni yumshatishga qaratilgan sa’y-harakatlar kabi bir qator masalalar bo‘yicha chuqur muhokamalar o‘tkazadi.
“Ushbu tashrif Pokistonning ushbu mamlakatlar bilan o‘zaro manfaatli ko‘p qirrali sohalardagi hamkorligi va muvofiqlashtirishini yanada mustahkamlash uchun imkoniyat yaratadi”, deyiladi bayonotda.
Shuningdek, Pokiston Bosh vaziri Shahboz Sharif shanba kuni Eron prezidenti Mas;ud Pezeshkiyon bilan bir soatlik telefon suhbati o‘tkazganini ma’lum qildi.
“Men Pokistonning Isroilning Eronga qarshi davom etayotgan hujumlarini, jumladan, yaqinda fuqarolik infratuzilmasiga qilingan hujumlarni qat’iy qoralashini yana bir bor ta’kidladim va Pokistonning jasur Eron xalqi bilan birdamligini bildirdim”, dedi Sharif va Pezeshkiyonga Pokistonning tinchlik yo‘lidagi sa’y-harakatlarini yuqori baholagani uchun minnatdorchilik bildirganini qo‘shimcha qildi.
Turkiya tashqi ishlar vaziri Hakan Fidan avvalroq uchrashuv dastlab Turkiyada rejalashtirilganini aytgan edi. Keyinroq Fidan Pokiston rasmiylarining o‘z mamlakatlarida qolishlari shart bo‘lganligi sababli uchrashuv Pokistonga ko‘chirilganini bildirdi.
