Rossiya 1-apreldan boshlab benzin eksportini to‘xtatadi
Mazkur chora boshqa davlatlar bilan tuzilgan kelishuvlarga hamda dizel yonilg‘isiga tatbiq etilmaydi.
Yonilg‘i narxlarining oshib borishi fonida Rossiya 1-apreldan benzin eksportini to‘xtatadi.Bu haqda "TASS" agentligiga tayanib, DW xabar bermoqda.
Ta’kidlanishicha, qaror ichki bozorni barqarorlashtirish va yoqilg‘i narxlarining oshishining oldini olish maqsadida joriy etilmoqda.
Rossiya Energetika vazirligi tomonidan tayyorlanayotgan tegishli qarorga ko‘ra, taqiq mamlakatning barcha bozor ishtirokchilariga tatbiq etiladi. Shu bilan birga, taqiq Rossiya hukumati boshqa davlatlar bilan tuzgan hukumatlararo kelishuvlar doirasidagi yetkazib berishlarga hamda dizel yonilg‘isiga tatbiq etilmaydi.
Hukumat matbuot xizmati bu chora “ichki bozorni ustuvor ta’minlash va benzin narxlarini barqarorlashtirishga” xizmat qilishini bildirgan.
Shuningdek, Energetika vazirligi mamlakatdagi neftni qayta ishlash hajmi 2025-yil mart oyidagi darajada saqlanib qolishini ma’lum qilgan. Bu esa ichki bozordagi neft mahsulotlari yetkazib berilishini barqaror ta’minlashga imkon beradi.
“Gazprom neft” kompaniyasi rahbari Aleksandr Dyukov Prezident Vladimir Putin ishtirokidagi Rossiya sanoatchilar va tadbirkorlar ittifoqi yig‘ilishidabenzin eksportini taqiqlash zarurligini ta’kidladi. Dyukovning so‘zlariga ko‘ra, AQSh va Isroilning Eronga qarshi urushi natijasida jahon bozorida neft va neft mahsulotlari narxi keskin oshgan. Shu sababli, ichki bozordan benzinni yuqori narxlarda sotish imkoniyati mavjud bo‘lgan tashqi bozorlarga oqib ketishining oldini olish lozim.
Bunday taqiqlar Rossiyada birinchi marta joriy etilayotgani yo‘q. Ukraina bilan urush boshlanganidan so‘ng va Rossiya neftni qayta ishlash zavodlariga hujumlar ortidan mamlakat hukumatlari bir necha bor shunday cheklovlar kiritgan. Oxirgi marta benzin eksporti bo‘yicha cheklovlar 2026-yil yanvar oyida yumshatilgan edi.
Shuningdek, 25-martga o‘tar kechasi Ukraina Leningrad viloyatidagi Ust-Luga portiga zarba bergan, bu esa Rossiyaning neft mahsulotlarini eksport qilish imkoniyatlarini yanada cheklagan.
"Kommersant" manbasiga ko‘ra, ushbu holat yaqin vaqt ichida mamlakatda neft qazib olish va qayta ishlash hajmining kamayishiga olib kelishi mumkin.
Eronga qarshi AQSh va Isroilning harbiy harakatlari jahon neft bozorida keskin tebranishlarga sabab bo‘lmoqda. Urush natijasida Ho‘rmuz bo‘g‘ozi orqali harakat to‘xtashi global neft yetkazib berishning taxminan 20 foiziga ta’sir qilgan.
