Rossiyaning Ukrainaga hujumlari oqibatida uch kishi halok bo‘ldi
Zarbalar oqibatida tug‘uruqxona tomi shikastlangan, xodimlar va bemorlar evakuatsiya qilingan.
28-martga o‘tar kechasi Rossiya qo‘shinlari Ukrainaning Odessa va Krivoy Rog shaharlariga dronlar bilan hujum uyushtirdi. Oqibatda kamida uch kishi halok bo‘lgan, yana o‘nlab fuqarolar jarohatlangan.
Odessa shahar harbiy ma’muriyati ma’lumotiga ko‘ra, shahar ikki marta dronlar bilan nishonga olingan. Hujumlar natijasida jarohatlanganlardan biri shifoxonada vafot etgan. Yana kamida 11 kishi, jumladan bir nafar bola jarohat olgan.
Dastlabki ma’lumotlarga ko‘ra, zarbalar oqibatida tug‘uruqxona tomi shikastlangan, Primorskiy tumanida ko‘p qavatli uylar zarar ko‘rgan va yong‘inlar yuzaga kelgan. Shuningdek, Hajibey tumanida ham yong‘inlar qayd etilgan, Kiyev tumanida esa noturar joy binolari shikastlangan va turar joylarda oynalar singan.
Shu bilan birga, Krivoy Rog shahriga ham dronlar bilan ommaviy hujum amalga oshirilgan.
Dnepropetrovsk viloyati rasmiylariga ko‘ra, sanoat korxonasiga zarba berilgan. Oqibatda ikki kishi halok bo‘lgan, yana ikki kishi jarohatlangan.
Rasmiylar hodisa yuzasidan tekshiruv ishlari davom etayotganini bildirgan.
