Shvetsiya markaziy masjidida O'zbekistondagi yangilanishlar yuqori baholandi
Muftiy Shayx Nuriddin Xoliqnazar Yangi O‘zbekistondagi diniy islohotlar, masjidlar, Qur’on kurslari va Fatvo markazi faoliyatini haqida gapirib berdi.
Shvetsiya poytaxti Stokgolm shahridagi “Zayd ibn Sulton al-Nahayyon” masjid-majmuasida O‘zbekiston delegatsiyasi va Shvetsiya diniy yetakchilari o‘rtasida samimiy muloqot bo‘lib o‘tdi.
Uchrashuvda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Yangi O‘zbekistondagi diniy islohotlar haqida so‘zlab berdi. Ayniqsa, mamlakatimiz masjidlari, Qur’on kurslarining faoliyati, mintaqada yagona bo‘lgan Fatvo markazi, imom va qorilarning xorijiy safarlari shvetsiyalik soha vakillarida katta qiziqish uyg‘otdi.
Muftiy hazratlari Ramazon hayiti arafasida Prezident tashabbusi bilan ochilgan Islom sivilizatsiyasi markazi va Imom Buxoriy masjid-majmuasi xalqimizga tuhfasi haqida so‘zlab, Shvetsiya vakillarini ushbu majmualar bilan yaqindan tanishishga taklif etdi.
Masjid bosh imomi Mahmud Xalfiy O‘zbekiston tarixidagi buyuk mutafakkirlar — Imom Buxoriy, Imom Termiziy, Imom Moturidiy kabi olimalar va Beruniy, Ibn Sino, Mirzo Ulug‘bek singari olimlarning ilm-fanga qo‘shgan hissasi, shuningdek, bugungi kunda mamlakat taraqqiyoti haqida so‘zlab berdi.
Shvetsiya Tashqi ishlar vazirligi maxsus vakili Kristian Kamil O‘zbekiston va Shvetsiya o‘rtasidagi o‘xshashliklarni ta’kidlab, delegatsiyalar o‘rtasidagi muloqotning ijobiy natijalar berayotganini qayd etdi.
