Shvetsiyada O‘zbekistonning ekstremizmga qarshi kurash tajribasi yuqori baholandi

Joriy yilning 24–25 mart kunlari Shvetsiya parlamenti – Riksdagda “O‘zbekistonda diniy bag‘rikenglik, ekstremizmga qarshi kurash va terrorchi guruhlarning sobiq a’zolarini reintegratsiya qilish tajribasi” mavzusida xalqaro seminar bo‘lib o‘tdi, deb xabar bermoqda “Dunyo” AA.

 

Ushbu nufuzli tadbirda O‘zbekiston musulmonlari idorasi raisi, muftiy Shayx Nuriddin Xoliqnazar, Din ishlari bo‘yicha qo‘mita raisining birinchi o‘rinbosari Davronbek Maxsudov, Yahudiylar diniy jamoasi raisi Arkadiy Isaxarov, Nemis lyuteran cherkovi raisi Lyudmila Shmidt, Oliy Majlis deputati Dilorom Fayzieva hamda taniqli dinshunos ekspertlardan iborat delegatsiya Stokgolmga tashrif buyurdi.

 

Seminarda Riksdag deputatlari, Shvetsiya hukumati a’zolari, siyosiy va ekspert doiralari, huquqni muhofaza qilish idoralari, diniy jamoalar va OAV vakillari, Stokgolmda akkreditatsiyadan o‘tgan xorijiy davlatlar elchilari – jami 120 dan ortiq ishtirokchi qatnashdi.

 

O‘zbekiston delegatsiyasi tomonidan mamlakatimizda so‘nggi yillarda diniy sohada amalga oshirilayotgan tub islohotlar, vijdon erkinligi va bag‘rikenglik muhitini mustahkamlash borasidagi tizimli chora-tadbirlarning samarali natijalari taqdim etildi. Jumladan, “Mehr” operatsiyasi orqali nizoli hududlardan qaytarilgan D.N. o‘z chiqishida O‘zbekistonda adashgan shaxslarga nisbatan qo‘llanilayotgan kechirimlilik va jaholatga qarshi ma’rifat bilan kurash siyosatining amaliy mohiyatini ochib berdi.

 

Shvetsiya rasmiylari va xalqaro ekspertlar O‘zbekiston tajribasini yuqori baholadi. Riksdagning “Shvetsiya – Markaziy Osiyo” do‘stlik guruhi rahbari, taniqli siyosatchi Bjorn Soder O‘zbekistonning ekstremizmga qarshi kurashdagi ilg‘or tajribasini o‘rganish ikki davlat manfaatlariga mos ekanini ta’kidladi. Shvetsiya TIVning dinlararo muloqot bo‘yicha maxsus vakili, elchi Kristian Kamil “Mehr” operatsiyalarini radikallashuv ildiziga berilgan kuchli zarba deb atab, O‘zbekiston tajribasi dinlararo muloqot xavfsizlikning eng mustahkam poydevori ekanini isbotlaganini qayd etdi.

 

Shvetsiya xavfsizlik va taraqqiyot siyosati instituti direktori, siyosatshunos Svante Kornell O‘zbekistonning musulmon dunyosi tarixidagi o‘rni va Prezident Shavkat Mirziyoyev tashabbusi bilan ochilgan Islom tsivilizatsiyasi markazining ahamiyatiga to‘xtalib, radikallashuvga qarshi ma’naviy va ijtimoiy usullar bilan kurashish samaradorligini alohida e’tirof etdi.

 

Seminar yakunida tomonlar bu kabi ochiq muloqotlar O‘zbekiston va Shvetsiya o‘rtasidagi o‘zaro ishonni mustahkamlash hamda uzoq muddatli hamkorlikni yangi bosqichga olib chiqishda muhim qadam bo‘lishini ta’kidladi.