Sirdaryolik yigit virus dastur orqali fuqarolarning bank kartalaridan pul o‘g‘irlagani aniqlandi
U Telegram orqali zararli dastur tarqatib, 200 dan ortiq fuqaroning pulini o‘zlashtirgan.
Telegram messenjeri orqali zararli ilovalarni tarqatib, fuqarolarning bank kartalaridan pul yechib olgan shaxs qo‘lga olindi. Bu haqda IIV xabar berdi.
Ma’lum qilinishicha, ichki ishlar organlariga Karmana tumanida yashovchi fuqaro murojaat qilib, turmush o‘rtog‘iga tegishli bank plastik kartasidan 22 million so‘m mablag‘ noma’lum tarzda yechib olinganini bildirgan. Holat yuzasidan tezkor-qidiruv ishlari olib borilgan.
Aniqlanishicha, jinoyatga aloqador shaxs 2004-yilda tug‘ilgan Sirdaryo viloyati fuqarosi bo‘lib, u Paynet to‘lov tizimi orqali go‘yoki doimiy daromad topish mumkinligi haqida yolg‘on ma’lumotlar tarqatgan. Shu yo‘l bilan u turli hududlarda yashovchi to‘qqiz nafar fuqaroni yakka tartibdagi tadbirkor sifatida ro‘yxatdan o‘tkazishga undagan va ularning akkauntlaridan foydalangan.
Shuningdek, gumonlanuvchi Telegram messenjeri orqali APK formatidagi zararli ilovalarni tarqatib, fuqarolarning mobil qurilmalarini virus bilan zararlagan. Natijada u ushbu qurilmalarga ulangan bank kartalaridan pul mablag‘larini yechib olgan hamda har bir tranzaksiyadan 5–7 foiz miqdorida ulush olib turgan.
Tezkor tadbirlar davomida Navoiy viloyati Ichki ishlar boshqarmasining axborot texnologiyalari sohasidagi jinoyatlarga qarshi kurashish bo‘limi xodimlari tomonidan ushbu shaxs qo‘lga olindi. Hozirga qadar u tomonidan sodir etilgan 121 ta kiberjinoyat aniqlangan.
Ma’lumotlarga ko‘ra, gumonlanuvchi jami 211 nafar fuqaroga tegishli bank kartalaridan 2 milliard so‘mdan ortiq mablag‘ni noqonuniy ravishda o‘zlashtirgan va bu pullarni shaxsiy ehtiyojlari uchun sarflab yuborgan.
Mazkur holat yuzasidan Jinoyat kodeksining 169-moddasi 3-qismi “b” bandi bilan jinoyat ishi qo‘zg‘atilgan. Gumonlanuvchiga nisbatan qamoqqa olish tarzidagi ehtiyot chorasi qo‘llanilgan, dastlabki tergov harakatlari davom etmoqda.
