Toshkentda 100 dan ortiq daraxt noqonuniy ko‘chirib o‘tkazligani aniqlandi
Tabiatga 881 million 268 ming so‘m miqdorida zarar yetkazilgani ma’lum bo‘ldi.
Toshkent shahri, Shayxontohur tumani, "Yunona" MFY, Abu Ali ibn Sino ko‘chasi hududida 108 tup daraxt noqonuniy ko‘chirib o‘tkazilgani yuzasidan o‘rganish ishlari olib borildi. Bu haqda Ekologiya va iqlim o‘zgarishi milliy qo‘mitasi xabar berdi.
Ma’lum qilinishicha, o‘rganish davomida 107 tup daraxt, ya’ni 12 tup mojjevelnik (archa) hamda 95 tup Eldor qarag‘ayi qurib qolganligi aniqlandi.
Xabarga ko‘ra, bu daraxtlarni ko‘chirish yuzasidan Toshkent shahar ekologiya bosh boshqarmasiga murojaat qilingan va boshqarma tomonidan rad javobi berilgan. Shunga qaramasdan daraxtlar noqonuniy tarzda ko‘chirib o‘tqazilgan.
Huquqbuzarlik natijasida, O‘zbekiston Respublikasi Vazirlar Mahkamasining 2022-yil 22-noyabrdagi “Davlat o‘rmon fondiga kirmaydigan daraxtlar va butalarni ekish, parvarish qilish va ulardan foydalanish tartibini yanada takomillashtirish to‘g‘risida”gi 464-son qaroriga ko‘ra, tabiatga 881 million 268 ming so‘m miqdorida zarar yetkazilganligi ma’lum bo‘ldi.
Holat yuzasidan to‘plangan hujjatlar huquqni muhofaza qiluvchi organlarga taqdim etish uchun tayyorlanmoqda.
