Toshkentda davlat bojini to‘lamagan MCHJning mashinasi xatlandi
Ayni paytda avtomashinani auksion orqali qarzdorlik hisobidan sotish choralari ko‘rilmoqda.
Majburiy ijro byurosining Olmazor tuman bo‘limi ish yurituviga sud va boshqa organlar qarorlariga asosan qarzdor “S.M.” MCHJdan davlat foydasiga jami 6 mlrd 237 mln 607 ming so‘m davlat boji va soliq qarzdorligini undirish to‘g‘risidagi ijro hujjati kelib tushgan hamda ijro ishi qo‘zg‘atilgan.
Ijro harakatlari davomida qarzdor tomonidan yuqoridagi qarzdorlik bartaraf etilmaganligi sababli majburiy ijro harakatlariga kirishilib, qarzdorga tegishli barcha mol-mulklarga taqiq o‘rnatilgan hamda belgilangan tartibda qidiruv eʼlon qilingan.
Majburiy ijro harakatlari davomida qarzdorga tegishli “LI XIANG L9” rusumli avtotransport vositasi xatlanib, jarima maydoniga joylashtirilgan.
Hozirda mazkur xatlangan avtotransport vositasi baholanib, auksion orqali qarzdorlik hisobidan sotish choralari ko‘rilmoqda.
Qarzdor tomonidan ushbu jarayon davomida qarzdorlik to‘liq qoplangan taqdirda, avtotransport vositasi mulk egasiga qaytariladi.
