Toshkentda Kichik halqa yo‘li vaqtincha yopiladi
28-martdan 31-martgacha Kichik halqa yo‘lining Chilonzor tumani hududidan o‘tuvchi bir tomonlama qismida harakat cheklanadi.
Toshkent shahridagi Kichik halqa avtomobil yo‘lida ta’mirlash ishlarining ikkinchi bosqichi boshlanishi munosabati bilan ayrim hududlarda transport harakati vaqtincha cheklanadi. Bu haqda Toshkent shahrida Yo‘l harakatini tashkil etish markazi xabar berdi.
Rasmiy ma’lumotlarga ko‘ra, yo‘l infratuzilmasini modernizatsiya qilish doirasida frezalash, asfaltlash hamda muhandislik tarmoqlarini yangilash ishlari olib boriladi.
Xususan, 2026-yil 28-mart soat 08:00 dan 31-mart soat 06:00 gacha Kichik halqa yo‘lining Chilonzor tumani hududidan o‘tuvchi bir tomonlama qismida — Lutfiy ko‘chasi kesishmasidan Asrlar sadosi ko‘chasi kesishmasigacha bo‘lgan yo‘nalishda harakat cheklanadi.
Ma’lum qilinishicha, mazkur davrda ushbu yo‘nalish bo‘ylab qatnovchi avtobuslar hamda boshqa transport vositalari harakati muqobil yo‘nalishlar orqali tashkil etiladi.
Mutasaddilar yuzaga kelishi mumkin bo‘lgan noqulayliklar uchun uzr so‘rab, haydovchilarga harakat yo‘nalishlarini oldindan rejalashtirishni tavsiya etmoqda.
