Toshkentda MIB orqali uy o‘z egasiga olib berildi
Maʼlum bo‘lishicha, fuqaro uyni boshqa odamga sotgan bo‘lsada, unda yashab kelgan.
Sud hujjatiga ko‘ra, qarzdor fuqaro S.S. va boshqalar undiruvchi T.S.ga mulk huquqi asosida tegishli bo‘lgan Yangihayot tumani, Mashʼal MFYda joylashgan uy-joydan boshqa turar joy bermasdan majburiy tartibda ko‘chirilishi belgilangan.
Aniqlanishicha, fuqarolar o‘rtasida qarz munosabati yuzaga kelgan bo‘lib, qarzdor fuqaro muayyan miqdordagi pul mablag‘ini olish maqsadida o‘z uyini tanishi nomiga notarial tartibda rasmiylashtirib bergan. Qarz shartnomasida olingan mablag‘ni 12 oy ichida qaytarish belgilangan.
Biroq belgilangan muddatda qarz mablag‘i qaytarilmagan. Shundan so‘ng pul bergan shaxs mazkur uyni boshqa shaxsga sotgan. Shu bilan birga, uy sotilganiga qaramasdan qarzdor fuqaro ushbu xonadonda yashashni davom ettirgan.
Uyni sotib olgan uchinchi shaxs mazkur holatdagi qarz munosabatlaridan bexabar bo‘lgan holda sudga murojaat qilgan va sud tomonidan uy-joyni unga topshirish haqida qaror qabul qilingan.
Mazkur ijro hujjati Byuroning Yangihayot tuman bo‘limi ish yurituviga 2026 yil 12 fevral kuni kelib tushgan. Qarzdorga ijro ishi yuritish qo‘zg‘atilgani haqida qaror yuborilgan.
Biroq sud hujjati talablari ixtiyoriy ravishda bajarilmaganligi sababli davlat ijrochisi Sh.Ahmadbekova tomonidan majburiy ijro harakatlari amalga oshirildi.
Natijada joriy yilning 13 mart kuni mazkur xonadondan qarzdor va boshqalar belgilangan tartibda chiqarilib, uy-joy qonuniy egasiga topshirildi.
