Xalqaro qidiruvda bo‘lgan ikki o‘zbekistonlik Turkiyada ushlandi
Yirik miqdordagi firibgarlikda gumonlanayotgan shaxslar O‘zbekistonga ekstraditsiya qilindi.
O‘zbekiston va Turkiya huquqni muhofaza qiluvchi organlari o‘rtasidagi samarali hamkorlik natijasida, yirik miqdorda firibgarlik jinoyatini sodir etib, xalqaro qidiruvda bo‘lgan xorazmlik 40 yoshli T.R. va toshkentlik 38 yoshli F.A. Turkiya hududida aniqlanib qo‘lga olingan.
Oʻzbekistonning Istanbuldagi Bosh konsulligi maʼlumotlariga koʻra, mazkur shaxslar O‘zbekiston Ichki ishlar vazirligi xodimlari tomonidan belgilangan tartibda qabul qilinib, sud oldida javobgarlikka tortilishi uchun mamlakatga qaytarilgan.
Ta’kidlash joizki, so‘nggi yillarda O‘zbekiston va Turkiya huquqni muhofaza qiluvchi organlari o‘rtasidagi amaliy hamkorlik izchil rivojlanib bormoqda. Bu yo‘nalishda jinoyatchilikka qarshi kurashish, xalqaro qidiruvda bo‘lgan shaxslarni aniqlash va ularni javobgarlikka tortish borasida samarali natijalarga erishilmoqda.
Hozirgi kunda ham mamlakat hududida turli jinoyatlar sodir etib, Turkiya hududida yashirinib yurgan boshqa shaxslarni aniqlash va qo‘lga olish bo‘yicha tezkor-qidiruv hamda huquqiy choralar davom ettirilmoqda.
