Avstriyada 20 yoshli futbolchi qiz YTH oqibatida halok bo‘ldi
U boshqarib ketayotgan avtomobil yuk mashinasi bilan to‘qnashgan.
Avstriyada yosh futbolchi Aleksandra Vimmer yo‘l-transport hodisasi oqibatida halok bo‘ldi. Bu haqda uning Blau-Vays Lins klubi matbuot xizmati ma’lum qildi.
Ma’lumotlarga ko‘ra, hodisa Linz shahridagi Mona Lisa Tunnelda sodir bo‘lgan. Avtomobilni boshqarib ketayotgan Vimmer yuk mashinasi bilan to‘qnashib ketgan. Transport vositasida bo‘lgan 15 yoshli yo‘lovchi turli jarohatlar bilan shifoxonaga olib ketilgan. Futbolchi esa hodisa joyida vafot etgan.
Klub rahbariyati va jamoa a’zolari yosh sportchining vafoti munosabati bilan chuqur qayg‘u bildirdi.
So‘nggi bor Vimmer Yuqori Avstriya akademiyasi jamoasi safida Vena yoshlar jamoasiga (U-20) qarshi maydonga tushgan edi. Mazkur uchrashuv 2:2 hisobidagi durang bilan yakunlangan.
