Chechenistonda kuchli yog‘ingarchilik sabab favqulodda holat e’lon qilindi
Tabiiy ofat oqibatlarini bartaraf etish uchun 300 dan ortiq qutqaruvchi jalb etilgan.
Chechenistonda kuchli yog‘ingarchilik va daryolarda suv sathining keskin ko‘tarilishi sabab favqulodda holat e’lon qilindi. Tegishli qarorni respublika rahbari Ramzan Qadyrov imzolagan.
Mahalliy rasmiy manbalarga ko‘ra, kuchli yomg‘ir hamda ayrim hududlarda yomg‘ir va qor ko‘rinishidagi yog‘ingarchiliklar oqibatida bir qator hududlarda suv toshqinlari xavfi yuzaga kelgan. Favqulodda vaziyat hududiga Grozny va Argun shahar okruglari hamda Gudermes, Nojay-Yurt, Shali, Urus-Martan, Kurchaloy, Vedeno, Itum-Kale, Sharoy va Shatoy tumanlari kiritilgan.
Ma’lumotlarga ko‘ra, 29-mart kuni Gudermes tumanidagi Kunduxovo qishlog‘idan 500 nafar fuqaro, jumladan 190 nafar voyaga bola evakuatsiya qilingan. Ayrim hududlarda transport harakati vaqtincha cheklangan. Xususan, Argun va Gudermes shaharlaridagi ko‘priklarga shikast yetgani sababli yo‘llar vaqtincha yopilgan.
Tabiiy ofat oqibatlarini bartaraf etish ishlari uchun 301 nafar qutqaruvchi hamda 66 ta maxsus texnika jalb etilgan.
Kuchli yog‘ingarchilik Kavkaz mintaqasining boshqa hududlariga ham ta’sir ko‘rsatgan. Xususan, Makhachkala shahrida ham favqulodda holat joriy etilib, yuzlab aholi xavfsiz hududlarga ko‘chirilgan.
