Shimoliy Koreya AQShga yetib borishi mumkin bo‘lgan raketa dvigatelini sinovdan o‘tkazdi
Mutaxassislar Pxenyan e’lon qilgan texnik ko‘rsatkichlar bo‘rttirilgan bo‘lishi mumkinligini bildirgan.
Shimoliy Koreya AQSh hududigacha yetib borishga qodir bo‘lishi mumkin bo‘lgan qit’alararo ballistik raketalarda qo‘llanadigan yangi qattiq yoqilg‘ili raketa dvigatelining yer usti sinovini o‘tkazdi. Bu haqda xalqaro axborot agentligi Associated Press (AP) xabar berdi.
Ma’lumotlarga ko‘ra, sinov jarayonini Shimoliy Koreya yetakchisi Kim Chen In shaxsan kuzatgan. Koreya Markaziy Axborot Agentligi (KCNA) ushbu sinov mamlakatning besh yillik mudofaa rivojlantirish dasturi doirasida strategik qurollarni yanada takomillashtirish yo‘lidagi muhim bosqich ekanini ta’kidlagan.
Xabarlarga ko‘ra, yangi uglerod kompozit materiallardan tayyorlangan dvigatel maksimal 2500 kilovatt tortish kuchini ishlab chiqaradi. Bu ko‘rsatkich 2024-yil sentabr oyida sinovdan o‘tkazilgan shunga o‘xshash qattiq yoqilg‘ili dvigatelning (1970 kilovatt) quvvatidan ancha yuqori ekani aytilmoqda.
Biroq Janubiy Koreyadagi ayrim mutaxassislar dvigatelning ishlash vaqti kabi asosiy texnik ko‘rsatkichlar ochiqlanmagani sababli Pxenyan tomonidan bildirilgan samaradorlik haqidagi da’volar bo‘rttirilgan bo‘lishi mumkinligini qayd etmoqda.
Associated Press qayd etishicha, so‘nggi yillarda Shimoliy Koreya bir necha bor qit’alararo ballistik raketalarni sinovdan o‘tkazgan va bu raketalar AQShning kontinental hududiga yetib borish imkoniyatiga ega ekani ta’kidlangan. Qattiq yoqilg‘ili raketalar esa suyuq yoqilg‘ili tizimlarga qaraganda tezroq uchirilishi va oldindan aniqlash qiyinligi bilan ajralib turadi.
