Toshkentda poyga uyushtirgan ikki haydovchi 10 sutkaga qamaldi
27 va 21 yoshli haydovchilar Lacetti hamda Onix’da poyga uyushtirgani aniqlangan.
Toshkentda yo‘l qatnov qismida poyga uyushtirib, jamoat tartibini buzgan ikki nafar haydovchi ma’muriy javobgarlikka tortildi. Bu haqda Yo‘l harakati xavfsizligi bosh boshqarmasi axborot xizmati rahbari Zoir Yo‘ldoshev ma’lum qildi.
Ma’lum qilinishicha, 27-mart kuni soat 03:40 atrofida poytaxtning Olmazor tumani ko‘chalaridan birida Lacetti va Onix rusumli avtomobillarda poyga uyushtirilayotgani, yo‘l harakati qoidalari hamda jamoat tartibi buzilayotgani yuzasidan xabar kelib tushgan.
Ichki ishlar organlari xodimlari tomonidan hududdagi kuzatuv kameralari yozuvlari va voqea guvohlarining ko‘rsatmalari o‘rganilib, surishtiruv ishlari olib borilgan. Natijada huquqbuzarlikni 27 yoshli Ramz Islomov hamda 21 yoshli Azimjon Abdusattorov sodir etgani aniqlangan.
Mazkur avtomobillar jarima maydoniga joylashtirilib, huquqbuzarlarga nisbatan tegishli hujjatlar sudga taqdim etilgan. Jinoyat ishlari bo‘yicha Olmazor tuman sudining qaroriga ko‘ra, har ikki haydovchiga nisbatan 10 sutkadan ma’muriy qamoq jazosi tayinlandi.
Haydovchilar o‘z qilmishidan pushaymon ekanini bildirib, fuqarolardan uzr so‘ragan. YHXB vakillari ushbu holatdan jabrlangan fuqarolar bo‘lsa, ichki ishlar organlariga murojaat qilishlarini so‘ragan.
