Eron AQShning 15 bandli rejasini “real emas” deb baholadi
Tehron Vashingtonning muzokaralar bo‘yicha takliflarini mantiqsiz deb atab, AQSh diplomatiyasiga ishonch pastligini ta’kidladi.
Eron Tashqi ishlar vazirligi AQSh tomonidan taqdim etilgan mojaroni hal qilish bo‘yicha 15 banddan iborat reja real emasligini ma’lum qildi. Bu haqda vazirlik matbuot kotibi bayonot berdi.
Uning so‘zlariga ko‘ra, AQSh tomonidan ilgari surilgan hujjatda “ortiqcha va mantiqsiz talablar” mavjud. Eron tomoniga turli nomlar ostida taqdim etilgan takliflar — 15 bandli yoki boshqa ko‘rinishdagi rejalarda Tehron uchun maqbul bo‘lmagan shartlar mavjudligi ta’kidlandi.
Diplomatning aytishicha, AQSh muzokaralarni taklif qilganida ko‘plab davlatlar ehtiyotkorlik bilan yondashadi, chunki Vashington diplomatiyasiga bo‘lgan ishonch darajasi masalasi ochiq qolmoqda. U Eronning turli masalalar bo‘yicha pozitsiyasi boshidanoq aniq bo‘lganini ham qayd etgan.
Shuningdek, Tehron Vashingtonning muzokaralarga haqiqatan ham tayyor ekaniga shubha bilan qarayotganini bildirgan. Ta’kidlanishicha, AQSh muzokaralar jarayoni davomida Eronga ikki marta — 2025-yil iyun va 2026-yil fevral oylarida hujum qilgan.
“Biz hozir AQSh harbiy tajovuzi kuchayib borayotgan vaziyatni boshdan kechirmoqdamiz. Shu sababli barcha sa’y-harakatlarimiz o‘zimizni himoya qilishga qaratilgan. Bu bayonotlarni samimiy deb hisoblamaymiz”, — degan vazirlik vakili.
Avvalroq Donald Tramp AQSh Eron bilan ham to‘g‘ridan-to‘g‘ri, ham vositachilar orqali muzokaralar olib borayotganini va maslahatlashuvlar “ijobiy ruhda kechayotganini” bildirgan edi.
