Eron AQSHning razvedka samolyotiga zarba berdi
Shikastlangan Boeing E-3 Sentry AWACS samolyotini yangi Boeing E-7 Wedgetail bilan almashtirish 700 million dollarga tushishi mumkin.
Eronning Saudiya Arabistonidagi aviabazasiga amalga oshirilgan hujumi natijasida, Amerika harbiylari Boeing E-3 Sentry AWACS razvedka samolyoti jiddiy zarar ko‘rgan bo‘lishi mumkin. Bu haqda BBC xabar berdi.
BBC ma’lumotlariga ko‘ra, internetda tarqalgan va tekshirilgan sputnik suratlarida E-3 Sentry samolyotining jiddiy shikastlangani, hatto ikkiga bo‘linganday ko‘ringani aks ettirilgan. Suratlar Ar-Riyoddan taxminan 100 km janubi-sharqda joylashgan “Shahzoda Sulton” aviabazasida olingani aniqlangan.
Tahlilchilar suratlardagi obyektlar — ustunlar, omborlar va maydon belgilari — sputnik tasvirlari bilan to‘liq mos kelganini ta’kidlagan.
Hozirga qadar AQSH Markaziy qo‘mondonligi holat yuzasidan rasmiy bayonot bermagan.
Eronning Fars agentligi esa, E-3 samolyotiga Shahed droni zarba berganini xabar qilgan. BBC esa 11-mart kuni olingan sputnik tasvirlarida aviabazada E-3 samolyoti qayd etilganini ma’lum qilgan, ammo bu aynan shu samolyot ekanligi hozircha aniq emas.
E-3 AWACS samolyoti Boeing 707 asosida ishlab chiqilgan bo‘lib, orqa qismidagi aylanuvchi radar orqali uzoq masofadagi nishonlarni aniqlash imkonini beradi. U 270 million dollardan- 300 million dollargacha baholanadi.U harbiy operatsiyalarda erta ogohlantirish va havo jangida nazoratni ta’minlashda muhim ahamiyatga ega.
The Wall Street ma’lumotiga ko‘ra, shikastlangan Boeing E-3 Sentry (AWACS) samolyotini yangi Boeing E-7 Wedgetail bilan almashtirish 700 million dollarga tushishi mumkin.
