Isroilning neft zavodiga zarba berildi
Hujum natijasida zavodda yong‘in yuzaga kelgan.
Isroilning Shimoliy hududidagi Bazan neft zavodida raketa hujumlari oqibatida yong‘in sodir bo‘ldi. Bu haqda BBC xabar bermoqda.
Ommaviy axborot vositalarida e’lon qilingan kadrlarda zavoddan tutun ko‘tarilayotgani aks etgan. Zavod ilgari ham joriy mojaroda nishonga olingan edi.
Isroil Yong‘in va qutqaruv xizmati ma’lumotiga ko‘ra, sanoat binosi va yonilg‘i tashuvchi tanker raketa yo‘q qilinganidan keyin qolgan qoldiqlar bilan zararlangan. Yong‘in xizmati jabrlanganlar yo‘qligini ammo olovning boshqa hududlarga tarqalishining oldini olish va yong‘in hududida qolgan shaxslarni qidirish ishlari davom etayotganini bildirgan.
Raketalar qayerdan uchirilgani hozircha noma’lum, ammo Isroil urush boshlanganidan beri Eron va Livandagi “Hizbulloh” guruhi tomonidan muntazam hujumlarga duch kelmoqda.
Avvalroq Yamandagi Eron tomonidan qo‘llab-quvvatlanadigan qurolli guruh — “Husiylar” shanba kuni Isroilga qarshi ballistik raketa hujumi uyushtirganini e’lon qilganini xabar bergandik.
