Italiyada mashhur rassomlarning millionlab yevrolik asarlari o‘g‘irlandi
Jinoyatchilar asarlarni uch daqiqa ichida olib qochishgan.
Italiyada Parma yaqinidagi Manyani-Rokka jamg‘armasining xususiy muzeyidan uchta mashhur rassomning asarlari o‘g‘irlandi. Bu haqda AFP agentligiga tayanib Deutsche Welle xabar berdi.
Qayd etilishicha, jinoyat 22 martdan 23 martga o‘tar kechasi sodir bo‘lgan. O‘g‘irlangan asarlar orasida Pyer Ogust Renuarning “Baliqlar”, Pol Sezannning qalam va akvarel bilan ishlangan “Gilosli tabiat manzarasi” hamda Anri Matissning akvarel “Terassadagi odaliska” asarlari mavjud.
Politsiya ma’lumotlariga ko‘ra, o‘g‘rilar to‘rtta bo‘lgan. Niqobli jinoyatchilar kirish eshigini buzib, birinchi qavatdagi zallardan biriga kirishgan va durdona asarlar bilan muzey bog‘i orqali qochib ketishgan. Butun operatsiya uch daqiqadan kam davom etgan.
Manyani-Rokka jamg‘armasi xodimlari hodisani oldindan rejalashtirilgan jinoyat deb atab, uni kengayishidan videokuzatuv tizimi hamda politsiya va xavfsizlik xodimlarining tezkor aralashuvi to‘xtatganini bildirgan. O‘g‘irlangan asarlarning taxminiy qiymati millionlab yevrolarga baholangan, tergov ishlari davom etmoqda.
Manyani-Rokka jamg‘armasi xususiy muzeyi tanqidchi va kolleksioner Luiji Manyani nomi bilan atalgan bo‘lib, unda Titsian, Dyurer, Rubens va Goya kabi san’at ustalarining asarlari saqlanadi. Muzey Italiyadagi eng muhim san’at kolleksiyalaridan biri hisoblanadi.
San’at olamida so‘nggi oylarda boshqa yirik jinoyatlar ham sodir bo‘lgan. 2025-yil 19-oktabrda Parijdagi Luvrdan Fransiya monarxlarining taxminan 88 mln yevro qiymatdagi qimmatbaho buyumlari o‘g‘irlangan edi.
