“Maktabgacha va maktab ta’limi vaziri kubogi” musobaqasining final bahslari yakunlandi
Surxondaryo viloyati Boysun tumanidagi 30-maktab jamoasi musobaqa g‘olibi bo‘ldi.
Termiz shahridagi Surxon arena maydonida o‘tkazilgan “Maktabgacha va maktab ta’limi vaziri kubogi” musobaqasining final bahslari yakunlandi.
Qayd etilishicha, musobaqaning 3-o‘rin uchun uchrashuvida Samarqand viloyati, Ishtixon tumani, 74-maktab jamoasi Surxondaryo viloyati, Qumqo‘rg‘on tumani, 42-maktab jamoasiga 0:2 hisobida imkoniyatni boy berdi.
Final uchrashuvida esa Qoraqalpog‘iston Respublikasi, Bo‘zatov tumani, 10-maktab jamoasi Boysun tumani, 30-maktab jamoasiga 0:3 hisobida mag‘lub bo‘ldi.
Yakuniy natijalarga ko‘ra, o‘quvchi qizlar o‘rtasida futbol bo‘yicha o‘tkazilgan musobaqada:
1-o‘rin: Surxondaryo viloyati, Boysun tumani, 30-maktab jamoasiga;
2-o‘rin: Qoraqalpog‘iston Respublikasi, Bo‘zatov tumani, 10-maktab jamoasiga;
3-o‘rin: Surxondaryo viloyati, Qumqo‘rg‘on tumani, 42-maktab jamoasiga nasib etdi.
G‘oliblarni taqdirlash marosimida Maktabgacha va maktab ta’limi vaziri E’zoza Karimova, Sport vaziri Adxam Ikramov, viloyat hokimligi va hamkor tashkilotlar mas’ullari, ishtirokchi o‘quvchi qizlar hamda ularning ota-onalari va keng jamoatchilik vakillari ishtirok etdi.
Musobaqa nizomiga ko‘ra, respublika bosqichida:
1-o‘rinni qo‘lga kiritgan Boysun tumanidagi 30-maktab jamoasi “Damas” avtomashinasi va 250 mln so‘m pul mukofotiga ega bo‘ldi;
2-o‘rinni olgan Bo‘zatov tumani, 10-maktab jamoasi “Damas” avtomashinasi va 200 mln so‘m pul mukofoti bilan taqdirlandi;
3-o‘rinni olgan Qumqo‘rg‘on tumani, 42-maktab jamoasi esa “Damas” avtomashinasi va 150 mln so‘m pul mukofotiga sazovor bo‘ldi.
Shuningdek, boshqa jamoalarga Sport vazirligi tomonidan vorkaut maydonchasi qurish bo‘yicha vaucher va 50 mln so‘m pul mukofoti, Davlat xavfsizlik xizmati va O‘zbekiston futbol assotsiatsiyasi tomonidan jami 800 mln so‘m qiymatdagi futbol koptoklari (har jamoaga 50 dona) va boshqa qimmatbaho sovg‘alar topshirildi.
Tadbir davomida taniqli san’atkorlar va madaniyat sohasi vakillari ishtirokida sahna ko‘rinishlari va bayram konsert dasturi tashkil etildi.
