O‘zbekistonning bir qator hududlarida giyohvand moddalar savdosining oldi olindi
Gumonlanuvchilar kuchli ta’sir qiluvchi moddalarni turli dori vositalari idishlarida yashirin holda olib kirgan.
Xorazm, Farg‘ona va Toshkent viloyatlarida giyohvandlik vositalari hamda kuchli ta’sir qiluvchi moddalarning noqonuniy aylanmasining oldi olindi. Bu DXX ma’lum qildi.
Qayd etilishicha, Xorazm viloyatining Urganch shahrida o‘tkazilgan tezkor tadbir davomida 1983-yilda tug‘ilgan shaxsning yonidan 5 gramm “opiy” moddasi aniqlangan. Shuningdek, u ijaraga olgan xonadondan 887 gramm “opiy” va 71 gramm “geroin” musodara qilingan. Tergov ma’lumotlariga ko‘ra, mazkur shaxs ushbu moddalarni qo‘shni davlatdan olib kelib, kelgusida sotishni rejalashtirgan.
Farg‘ona viloyatidagi holatda esa 1991-yilda tug‘ilgan fuqaroning yashash xonadonidan Qirg‘izistondan noqonuniy olib kirilgan 2800 dona “Regapen” dori vositasi aniqlangan. Ularning umumiy qiymati 140 million so‘mga baholangan.
Toshkent viloyatida qayd etilgan yana bir holatda 1996-yilda tug‘ilgan shaxs va uning tanishi — 1994-yilda tug‘ilgan Qozog‘iston fuqarosi 300 millilitr “Tropikamid” moddasini 300 AQSH dollari va 600 ming so‘mga sotish vaqtida qo‘lga olingan. Ulardan shuningdek “Pregabalin” kapsulalari va “Tropikamid” saqlangan flakonlar ham musodara qilingan.
Ma’lum bo‘lishicha, gumonlanuvchilar kuchli ta’sir qiluvchi moddalarni mamlakat hududiga turli dori vositalari idishlarida yashirin holda olib kirgan.
Hozirda mazkur holatlar yuzasidan jinoyat ishlari qo‘zg‘atilib, tergov harakatlari olib borilmoqda.
