Surxondaryo viloyatida “Surxon-Agro” erkin iqtisodiy zonasi tashkil etiladi
O‘zbekistonda aholini kuz-qish mavsumida oziq-ovqat bilan ta’minlash bo‘yicha qo‘shimcha choralar belgilandi.
O‘zbekistonda aholini kuz-qish mavsumlarida qishloq xo‘jaligi mahsulotlari bilan barqaror ta’minlashga qaratilgan qo‘shimcha choralar belgilandi. Bu haqda Prezidentning 25-martdagi “Aholini kuz-qish mavsumlarida qishloq xo‘jaligi mahsulotlari bilan barqaror ta’minlashning qo‘shimcha chora-tadbirlari to‘g‘risida”gi qarorida ma’lum qilindi.
Qarorda 2026 - 2027-yillarda respublikada issiqxonalar faoliyatini rivojlantirishning asosiy maqsadli ko‘rsatkichlari belgilandi.
Hujjatga ko‘ra, Surxondaryo viloyatining Sherobod tumanida kamida 940 gektar maydonda zamonaviy issiqxona majmualarini tashkil etish rejalashtirilgan.
Shuningdek, issiqxonalarda energiya tejamkor hamda muqobil energiya manbalariga asoslangan isitish tizimlari ulushini kamida 50 foizga yetkazish ko‘zda tutilgan. Atmosfera havosiga zararli tashlamalar chiqarayotgan tadbirkorlik subyektlari faoliyatini esa bosqichma-bosqich qisqartirish rejalashtirilmoqda.
Qarorga muvofiq, Surxondaryo viloyati Sherobod tumanida “Surxon-Agro” erkin iqtisodiy zonasi tashkil etiladi.
Mazkur hududda faoliyat yuritadigan issiqxona xo‘jaliklariga qator imtiyoz va preferensiyalar beriladi. Xususan, yer uchastkalari tadbirkorlarga elektron onlayn auksion orqali ijaraga berilganda, 5 yil davomida ijara to‘lovi nol stavkada qo‘llanadi.
Bundan tashqari, issiqxonalarni sug‘orish va texnologik jarayonlar uchun foydalaniladigan oqova hamda yer osti suvlaridan foydalanganlik uchun to‘lovlardan 3 yil muddatga ozod etish belgilangan.
Shuningdek, anomal sovuq ob-havo sharoitlari davrida ekologik talablarga rioya etilgan holda istisno tariqasida ko‘mir yoqishga ruxsat berilishi ko‘zda tutilgan.
