Turkiyaning “Ona-do‘li otashi” raqs ansambli poytaxtda o‘z konsert dasturini namoyish etdi

Toshkentdagi O‘zbekiston xalqaro forumlar saroyida turk raqs ansambli “Anadolu Ateshi” (Anadolu olovi)ning jonli konserti bo‘lib o‘tdi. 

 

Konsertda O‘zbekiston Respublikasi madaniyat vaziri – Ozodbek Nazarbekov va Turkiyaning O‘zbekistondagi elchisi Ufuk Ulutash, shuningdek, turk raqs san’ati muxlislari ishtirok etishdi.

 

 

Ma’lum qilinishicha, “Ona-do‘li otashi” ansambli — Turkiyaning dunyoga mashhur raqs ansambli bo‘lib, milliy an’analar va zamonaviy sahna san’atini o‘zida mujassam etgan yirik madaniy loyihadir.  Chorak asrdan ko‘proq vaqt davomida dunyo sahnalarini zabt etib kelayotgan ushbu mashhur ansambl butun dunyo bo‘ylab millionlab tomoshabinlarning mehri va e’tirofiga sazovor bo‘lgan.

 

Konsert dasturida raqsning qadimiy kelib chiqishi, uning falsafiy chuqurligi va ko‘p qirrali mohiyatini ochib beruvchi jozibali teatrlashtirilgan tomosha namoyish etildi.

 

 

Jamoa 1999-yilda turk xoreografi Mustafa Erdoğan tomonidan tashkil etilgan. Ansambl tashkil etilishidan ko‘zlangan asosiy maqsad — Anadolu hududining boy madaniy merosini, xalq raqslari va musiqiy an’analarini zamonaviy sahna talqini orqali butun dunyoga namoyish etish edi. Shu maqsadda Turkiyaning turli mintaqalaridan iqtidorli raqqoslar saralab olingan va yagona jamoa sifatida shakllantirilgan. 100 dan ortiq professional raqqoslar faoliyat yuritadigan “Ona-do‘li otashi” ansambli o‘z chiqishlarida turk xalq raqslari, balet, zamonaviy raqs va teatral elementlarni uyg‘unlashtiradi. Sahna ko‘rinishlari keng qamrovli kompozisiyalar, yorqin liboslar, ta’sirchan musiqa va yuqori darajadagi sinxron harakatlar bilan ajralib turadi.

 

 Ansambl dunyoning ko‘plab davlatlarida gastrol safarlarida bo‘lgan va xalqaro festivallarda ishtirok etgan. Ansambl dasturlari orasida “Fire of Anatolia” hamda “Troy” kabi mashhur sahna asarlari mavjud. Jamoa ayrim tezkor raqs chiqishlari bilan Ginnes rekordlar kitobiga ham kiritilgan.