1-apreldan Hindistonga kirish uchun elektron kelish kartasi talab qilinadi
Qog‘oz shaklidagi kelish kartalaridan foydalanish to‘liq bekor qilinadi.
Hindistonga sayohat qilishni rejalashtirayotgan xorijiy fuqarolar uchun kirish tartibida muhim o‘zgarish joriy etildi. 2026-yil 1-apreldan boshlab mamlakatga kirishda qog‘oz shaklidagi kelish kartalaridan foydalanish to‘liq bekor qilinadi.
Yangi qoidalarga muvofiq, barcha xorijiy sayohatchilar mamlakatga kelishdan avval elektron kelish kartasini rasmiylashtirishi shart bo‘ladi. Ariza kelishdan kamida 72 soat oldin onlayn tarzda to‘ldirilishi kerak.
Mazkur jarayon Su-Swagatam mobil ilovasi yoki Hindistonning rasmiy viza xizmati portali orqali amalga oshiriladi.
Avval qog‘oz va elektron shakllar birgalikda qo‘llanilgan o‘tish davri 31-mart kuni yakunlanadi. 1-apreldan boshlab esa mamlakat chegarasidan o‘tish uchun elektron tasdiqlangan kelish kartasi majburiy hisoblanadi.
Mutaxassislarning ta’kidlashicha, yangi tizim pasport nazorati jarayonini tezlashtirish, aeroportlarda yuzaga keladigan navbatlarni kamaytirish hamda migratsiya jarayonlarini raqamlashtirishga xizmat qiladi.
