Eron xalqining matonati tufayli urush bir oydan buyon davom etmoqda — Eron elchixonasi
Eron hukumati suvereniteti va xavfsizligini himoya qilish maqsadida har qanday agressiyaga javob berish uchun barcha imkoniyatlarini safarbar etishini ma’lum qildi.
AQSh va Isroil bir oy davomida Eronning 600 ta ta’lim muassasasi, 93 233 ta noharbiy obyektini nishonga olgan. 28-mart holatiga ko‘ra, 281 nafar maktab o‘quvchilari va o‘qituvchilari halok bo‘lgan, yaralangan ayollar soni esa 4000 nafarga yetdi. Bu haqda Eron Islom Respublikasining O‘zbekistondagi elchixonasi matbuot xizmati ma’lum qildi.
AQSh va Isroil Erondagi siyosiy rejimni ag‘darish va urushni tez tugatishni reja qilgan edi. Biroq Eron tomonidan qaytarilgan javoblarni AQSh va Isroil hukumatlari kutmagan edi va urush bir oydan oshiq vaqtdan beri davom etib kelmoqda.
“AQSh va Isroil Eron xalqi irodasini buka olamiz, degan aniq-ravshan xato hisob-kitob bilan islomiy Eronga noqonuniy hujum boshlagan edilar. Eron qurolli kuchlarining ogohligi va xalqining matonatli qarshilik ko‘rsatishi tufayli bir oydan buyon o‘zlarining e’lon qilgan maqsadlariga yetolmadilar, balki aksincha ushbu ikki bosqinchi rejimning kuchsizligi, chorasizligi va notavonligi butun jahon ahli ko‘z oldida kundan kunga oshkor bo‘lib bormoqda”, — deyiladi Elchixona bayonotida.
Ma’lumotlarga ko‘ra, AQSh va Isroil Eronning 370 ta shifoxona va shoshilinch tibbiy markazlari, shuningdek, 43 ta tez yordam mashinasiga hujum qilgan.
Bayonotda yozilishicha, Eron BMT Nizomining 51-moddasiga asosan o‘zini himoya qilmoqda. Elchixona mamlakat suvereniteti va xavfsizligini himoya qilish maqsadida bunday agressiyaga javob berish uchun barcha imkoniyatlarini safarbar etishini ma’lum qildi.
Eron ushbu oshkora agressiya qarshisida BMT Nizomining 51-moddasida bayon etilgan o‘zini qonuniy himoya qilish huquqidan foydalanmoqda, davlatimiz qurolli kuchlari barcha imkoniyatlarni safarbar etgan holda ushbu agressiyaga javob berib, o‘z xavfsizligi va milliy suverenitetini himoya qiladi.
“Yana bir bor xalqaro tinchlik va xavfsizlikni saqlashga mas’ul bo‘lgan davlatlarning rolini eslatgan holda, ushbu davlatlardan BMT Nizomi va xalqaro huquqning fundamental prinsiplariga asosan ushbu agressiya harakatlarini ochiq-oydin qoralashlarini hamda xalqaro huquq-tartibotni saqlash bo‘yicha o‘z rollarini o‘ynashlarini so‘raymiz” deyiladi Elchixona xabarida.
Elchixonaga bayonotiga ko‘ra, Eron shu vaqtga qadar AQSh bilan hech qanday muzokara yoki muloqot amalga oshirilmagan.
Shohjahon Majid
Zamon.uz muxbiri
