Erondan Turkiyaga yana ballistik raketa uchirildi

Turkiya Mudofaa vazirligi 30-mart kuni Erondan uchirilgan ballistik raketa mamlakat havo hududiga kirishi bilan tutib olinganini ma’lum qildi.

 

Rasmiy ma’lumotlarga ko‘ra, bu Yaqin Sharqda harbiy mojaro boshlanganidan buyon Turkiya tomon yo‘naltirilgan to‘rtinchi raketa hisoblanadi. Avvalgi holatlarda bo‘lgani kabi, barcha snaryadlar zararsizlantirilgani qayd etilgan.

 

Vazirlik bayonotida ta’kidlanishicha, Eron tomonidan uchirilgan va Turkiya havo hududiga kirgani aniqlangan ballistik o‘q-dorilar O‘rta Yer dengizining sharqiy qismida joylashtirilgan NATO havo va raketaga qarshi mudofaa kuchlari tomonidan yo‘q qilingan.

 

NATO vakili Allison Hart ham ushbu ma’lumotni tasdiqlab, alyansning navbatdagi tahdidni bartaraf etganini bildirdi.

 

“30-mart kuni NATO yana Eronning Turkiyaga yo‘l olgan ballistik raketasini muvaffaqiyatli urib tushirdi. Alyans tahdidlarga doim tayyor va barcha ittifoqchilarni himoya qilish uchun zarur choralarni ko‘radi”, — dedi u.

 

Avvalroq Turkiya prezidenti Rajab Toyyib Erdo‘g‘an mamlakat harbiy mojaroga tortilishdan qochishini bildirgan edi. Eronning Turkiyadagi elchixonasi esa uchirilgan to‘rtta raketa ortida Tehron turganini rad etib, voqealarni o‘rganish uchun qo‘shma tergov guruhi tuzishni taklif qilgan.

 

Eron ilk bor 4-mart kuni Turkiya tomon raketa uchirgani, u Iroq va Suriya havo hududi orqali mamlakatga kirgani xabar qilingandi. O‘shanda ham NATO tizimi raketani urib tushirgan.

 

9-mart kuni ikkinchi raketa Turkiya havo hududiga kirgan paytda yo‘q qilingan, uning parchalari Gaziantep shahri yaqiniga tushgan, qurbonlar qayd etilmagan.

 

13-mart kuni uchinchi bor uchirilgan ballistik raketa ham NATO havo hujumidan mudofaa tizimi tomonidan urib tushirilgan.

 

Turkiya rasmiylari mamlakat “yaxshi qo‘shnichilik” tamoyillariga amal qilishini va mintaqadagi barqarorlikni qo‘llab-quvvatlashini ta’kidlab, shu bilan birga hududiga qaratilgan har qanday tahdidga nisbatan zarur choralar ko‘rilishini ma’lum qilgan.