Havo sifati yomonlashganda davlat xizmatchilari masofaviy ishlashga o‘tkazilishi mumkin

O‘zbekistonda havo sifati keskin yomonlashganda amal qilinadigan harakatlar tartibi (algoritmi) ishlab chiqiladi. Tartib Prezident farmonida belgilangan me’yorlarga muvofiq, 1 oy ichida ishlab chiqilishi lozim.

 

Bu tartib, jumladan aholini tezkor ogohlantirish, zaif guruhlarni uyda qolishga chaqirish, ommaviy tadbirlarni cheklash, ta’lim muassasalarida ochiq havodagi mashg‘ulotlarni vaqtincha bekor qilish hamda davlat tashkilotlarida ish rejimini o‘zgartirish yoki masofaviy shaklga o‘tkazish choralarini o‘z ichiga oladi.

 

Belgilangan asosiy choralar:

 

— Tezkor ogohlantirish: Havo sifati xavfli darajaga yetganda aholi SMS-xabarlar, ommaviy axborot vositalari va raqamli platformalar orqali xabardor qilinadi; rasmiy xavf darajalari bo‘yicha ma’lumot beriladi;

 

— Aholini himoya qilish: Bolalar, keksalar va surunkali kasalligi bor shaxslar uchun uyda qolish tavsiya qilinadi; ochiq havodagi mashg‘ulotlar vaqtincha bekor qilinadi; ommaviy tadbirlar cheklanishi mumkin; davlat tashkilotlarida ish rejimi o‘zgartiriladi yoki masofaviy ish shakliga o‘tkaziladi;

 

— Sanoat va transport sohalarida choralar: Ifloslanish manbalariga operativ nazorat o‘rnatiladi; energetika korxonalarida mazut yoqish cheklanadi (ekstremal harorat holatlaridan tashqari); sanoat korxonalarida tashlanmalar vaqtincha kamaytiriladi yoki to‘xtatiladi; qurilish ishlari va transport harakati cheklanadi; changni bostirish uchun favvoralar, daraxtlar va yo‘l chetlariga suv sepish ishlari amalga oshiriladi.

 

Shuningdek, 2026-yil 30-dekabrgacha havo sifati yomonlashishi bilan bog‘liq holatlarni huquqiy tartibga solish, oldini olish va oqibatlarini kamaytirishga qaratilgan normativ-huquqiy hujjat loyihasi kiritilishi lozim.

 

Ifloslanish yuqori bo‘lgan hududlarda tashlamalarni cheklash tizimi joriy etiladi: hududlarning antropogen yuklama me’yorlari aniqlanadi, ruxsat etilgan tashlamalar hajmi belgilab chiqiladi, umumiy kvota bosqichma-bosqich kamaytiriladi, tashlamalar kadastri yuritiladi.

 

Normativ-huquqiy hujjat loyihasi 2026-yil 1 dekabrga qadar kiritilishi lozim.

 

Aholi salomatligi monitoringi:

 

— Havo ifloslanishining odam organizmiga ta’siri ilmiy jihatdan o‘rganiladi (nafas olish tizimi, yurak-qon tomir tizimi, allergik kasalliklar).

 

— Yuqori xavfli guruhlar (bolalar, qariyalar, homilador ayollar) uchun maxsus tavsiyalar ishlab chiqiladi.

 

— Havo ifloslanishiga nisbatan salomatlik tahdidini baholaydigan xavf indikatorlari yaratiladi va sog‘liqni saqlash tizimiga integratsiya qilinadi.