O'zbekistonda Ekologik komissiyaning vakolatlari butun respublika miqyosida kengaytirildi
Komissiyaning nomi “Respublika maxsus komissiyasi” deb o‘zgartirilib, faoliyati 2027-yil 1-martga qadar uzaytirildi.
So‘nggi paytlarda havo tozaligi, chang-to‘zonlar va ekologik muammolar jamiyatning eng dolzarb mavzulariga aylangan. Toshkent shahrida boshlangan ekologik tashabbuslar endi faqat poytaxt bilan cheklanmay, butun O‘zbekiston bo‘ylab tizimli va strategik bosqichga ko‘tarilmoqda.
Yangi Farmonga muvofiq, Toshkent shahrida ekologik vaziyatni yaxshilash bo‘yicha kechiktirib bo‘lmaydigan chora-tadbirlarni amalga oshirish maqsadida tuzilgan maxsus komissiya faoliyati 2027-yil 1-martga qadar uzaytirildi.
Muhim o‘zgarishlardan biri komissiyaning maqomida bo'lib, endilikda u «Ekologik vaziyatni yaxshilash yuzasidan kechiktirib bo‘lmaydigan chora-tadbirlarni amalga oshirish bo‘yicha Respublika maxsus komissiyasi» deb ataladi.
Bu shuni anglatadiki, havoni tozalash, sanoat filtrlari o‘rnatish va yashillikni ko‘paytirish kabi ekologik vazifalar endi faqat Toshkent bilan cheklanmaydi. Butun mamlakatdagi ekologik vaziyat Respublika komissiyasining qat’iy nazorati va boshqaruvi ostida bo‘ladi.
Davlat ekologik inqirozlarga vaqtinchalik yoki lokal yechim emas, balki tizimli, uzoq muddatli va butun respublika miqyosida strategik yechim izlamoqda. Shu tariqa, kelgusi yillarda butun yurt bo‘ylab toza havo va sog‘lom muhit yaratish yo‘lida muhim va amaliy o‘zgarishlar kutilmoqda.
