Rossiya ham tayyor bo‘lsa Ukraina o‘t ochishni to‘liq to‘xtatadi — Zelenskiy
Ukraina Prezidenti Rossiyaga qarshi zarbalar faqat javob chorasi sifatida amalga oshirilayotganini bildirdi.
Ukraina prezidenti Volodimir Zelenskiy mamlakat har qanday muddatda o‘t ochishni to‘liq to‘xtatishga tayyor ekanini ma’lum qildi. Zelenskiy bu haqda o‘zining Telegram-kanalida yozib, Rossiya bilan ehtimoliy sulh masalasiga to‘xtaldi.
Uning ta’kidlashicha, Ukraina Rossiyaga qarshi zarbalarni tashabbus sifatida emas, balki javob chorasi sifatida amalga oshirmoqda. Zelenskiy, shuningdek, global energetika inqirozi fonida ayrim hamkor davlatlardan Rossiyaning neft va energetika sektoriga qarshi hujumlarni kamaytirish bo‘yicha signallar olinganini qayd etdi.
“Yana bir bor ta’kidlayman: agar Rossiya Ukraina energetikasiga zarba bermaslikka tayyor bo‘lsa, biz ularning energetikasiga javob qaytarmaymiz”, — dedi u.
Zelenskiyga ko‘ra, Ukraina to‘liq o‘t ochishni to‘xtatish, energetik sulh hamda oziq-ovqat xavfsizligi bo‘yicha kelishuv variantlarini ilgari surgan va ularni muhokama qilishga tayyor.
“Biz har qanday o‘t ochishni to‘xtatish variantini muhokama qilishga tayyormiz. To‘liq o‘t ochishni to‘xtatish, energetik sulh va oziq-ovqat xavfsizligi bo‘yicha sulh — bularning barchasini taklif qilganmiz va bunga ochiqmiz. Agar rossiyaliklar tayyor bo‘lsa, istalgan muddatga taklif qilinsin, bu masalani hal etishga sobitmiz”, — deya yozdi u.
Shuningdek, u Ukraina suvereniteti va qadr-qimmati masalasida murosa qilmasligini ta’kidladi.
