Rossiyada ayrim huquqbuzarliklar uchun chet elliklarni deportatsiya qilish taklif qilindi
Yangi tashabbusga ko‘ra, ruxsatsiz mitinglarda qatnashgan yoki ekstremistik faoliyat bilan bog‘liq huquqbuzarlik sodir etgan chet el fuqarolari mamlakatdan chiqarilib yuborilishi mumkin.
Rossiyada ayrim huquqbuzarliklarni sodir etgan chet el fuqarolari va fuqaroligi bo‘lmagan shaxslarni mamlakatdan chiqarib yuborishni nazarda tutuvchi qonun loyihasi Davlat Dumasiga taqdim etildi. Bu haqda TASS xabar berdi.
Qonun loyihasiga ko‘ra, Ma'muriy huquqbuzarliklar to'g'risidagi kodeksga tegishli o‘zgartirishlar kiritilishi rejalashtirilmoqda. Unga muvofiq, agar huquqbuzarlik chet el fuqarosi tomonidan sodir etilgan bo‘lsa, ma’muriy jarimalar bilan bir qatorda Rossiya hududidan ma’muriy deportatsiya chorasi qo‘llanishi mumkin.
Taklif etilayotgan normalarga binoan, ruxsatsiz mitinglarda qatnashish, Rossiya Qurolli Kuchlarini obro‘sizlantirish, Rossiya va uning fuqarolariga qarshi sanksiyalar joriy etishga chaqirish hamda mamlakat hududiy yaxlitligiga qarshi chiqish kabi harakatlar uchun chet el fuqarolarini mamlakatdan chiqarib yuborish mumkin bo‘ladi.
Bundan tashqari, favqulodda holat, aksilterror operatsiyasi yoki harbiy holat talablarini buzish, ruxsat etilmagan joylarda otishma qilish, transport harakatiga to‘sqinlik qilish, huquqni muhofaza qiluvchi organlar talablariga bo‘ysunmaslik va mayda bezorilik kabi huquqbuzarliklar ham ma’muriy deportatsiya uchun asos bo‘lishi mumkin.
Qonun loyihasida ekstremizm va buzg‘unchi axborot bilan bog‘liq huquqbuzarliklar uchun ham qat’iy choralar nazarda tutilgan. Xususan, diniy ramzlarni tahqirlash, nafrat va adovat qo‘zg‘atish, ekstremistik yoki natsistik ramzlarni targ‘ib qilish, ekstremistik materiallarni ishlab chiqarish va tarqatish, shuningdek terrorizmga chaqiriqlarni tarqatish kabi holatlar uchun ham chet elliklarni deportatsiya qilish taklif etilmoqda.
Shu bilan birga, ayrim huquqbuzarliklar uchun jarimalarni oshirish ham ko‘zda tutilgan. Bu choralar Rossiya chegarasini kesib o‘tish qoidalarini buzish, mamlakatga kirish va unda bo‘lish tartibiga rioya qilmaslik, chet el fuqarolarining noqonuniy ishlashi hamda migrantlarni noqonuniy yollash bilan bog‘liq huquqbuzarliklarga nisbatan qo‘llanishi mumkin.
