Surxondaryoda pensionerlardan iborat narkojinoiy guruh fosh etildi
Afg‘oniston fuqarosi ta’minotchi sifatida bir guruh keksalar bilan o‘zaro til biriktirib, giyohvandlik moddalarini tarqatish bilan shug‘ullanib kelgan.
Surxondaryo viloyatida uyushgan narkojinoiy guruh faoliyatiga chek qo‘yildi. Bu haqda viloyat Ichki ishlar boshqarmasi ma’lum qildi.
Ma’lumotlarga ko‘ra, Afg‘oniston fuqarosi ta’minotchi sifatida bir guruh Surxondaryolik bo‘lgan keksa yoshli fuqarolar bilan o‘zaro jinoiy til biriktirib, Termiz shahri va tumani hududlarida narkokurerlik qilib, giyohvandlik moddalarini tarqatish bilan shug‘ullanib kelgan.
Surxondaryo viloyati Ichki ishlar boshqarmasi tezkor qidiruv xizmati hamda Davlat xavfsizlik xizmati xodimlari bilan hamkorlikda o‘tkazilgan tezkor tadbirda gumonlanuvchilardan biri to‘xtatilib tekshirilganda, uning yonidan opiy giyohvandlik moddasi borligi aniqlandi. Tadbir davomida ushbu moddalarni yetkazib bergan yana bir shaxs ham aniqlanib, undan maxsus tadbir uchun berilgan pul mablag‘lari daliliy ashyo sifatida rasmiylashtirib olindi. Davom ettirilgan tekshiruvlar natijasida guruhning yana bir a’zosi ushlandi. Uning yonidan 5 gramm giyohvandlik moddasi aniqlandi.
Keyingi bosqichda esa ushbu jinoiy zanjirning asosiy bo‘g‘ini fosh etildi. Uning yashash xonadonidan jami 12 dona qadoqlangan 12,42 gramm opiy moddalari aniqlandi. Xonadonda giyohvandlik moddalarini iste’mol qilish vositalari ham borligi ma’lum bo‘ldi.
Qayd etilishicha, gumonlanuvchilar o‘z ayblarini yashirishga uringan holda sheriklarini ham fosh qilgan.
Hozirda ushbu holat yuzasidan barcha gumonlanuvchilarga nisbatan O‘zbekiston Respublikasi Jinoyat kodeksining 276 va 273-moddalari bilan jinoyat ishi qo‘zg‘atilib, qamoqqa olish ehtiyot chorasi qo‘llanilgan.
