Toshkent xalqaro moliya markazi tashkil etiladi
Markaz hududida konstitutsiyaviy qonun bilan belgilanadigan maxsus huquqiy rejim joriy etiladi.
O‘zbekistonda Toshkent xalqaro moliya markazini tashkil etish to‘g‘risidagi prezident farmoni qabul qilindi. Bu haqda “Huquqiy axborot” Telegram-kanali xabar berdi.
Farmonga muvofiq, Toshkent xalqaro moliya markazi hamda uning tarkibida Toshkent xalqaro tijorat sudi tashkil etiladi.
Hujjatga ko‘ra, markaz hududida moliyaviy, investitsiya va bank faoliyati, sug‘urta, raqamli (kripto) aktivlar, qimmatli qog‘ozlar, to‘lov tizimlari va xizmatlari, islomiy va yashil moliya, moliyaviy texnologiyalar bilan bog‘liq xizmatlar ko‘rsatish va tranzaksiyalarni amalga oshirish, auditorlik, konsalting va yuridik xizmatlar ko‘rsatishga ruxsat beriladi.
Farmonga asosan, markaz hududida konstitutsiyaviy qonun bilan belgilanadigan maxsus huquqiy rejim joriy etiladi.
Shu bilan birga, markaz boshqaruv organlariga fuqarolik, korporativ, tijorat, moliya, bank, soliq, davlat xaridlari, mehnat huquqi hamda shaxsiy ma’lumotlarni himoya qilish sohalarini tartibga soluvchi normativ-huquqiy hujjatlarni qabul qilish vakolati beriladi.
Shuningdek, markaz hududida Angliya va Uelsning umumiy huquqi hamda adolat tamoyillari to‘g‘ridan to‘g‘ri qo‘llaniladi.
Toshkent xalqaro tijorat sudi esa birinchi instansiya va apellyatsiya bosqichlaridan iborat bo‘ladi.
