Toshkentda avtobus piyodalar yo‘lagidan o'tayotgan ona-bolani turtib ketdi
Mazkur holat yuzasidan rasmiy ma’lumot berilib, haydovchi ishdan olindi.
Toshkent shahri Sergeli tumanida piyodalarga yo‘l bermasdan ularni turtib ketgan haydovchi ishdan olindi. Bu haqda “Toshshahartransxizmat” kompaniyasi xabar berdi.
Ma’lum qilinishicha, holat 30 mart kuni at taxminan 17:50larda 12-avtobus saroyi filiali tasarrufida bo‘lgan, “Saz Le 60” rusumli, davlat raqami 01| 845 ZJA, saroy raqami 039-bo‘lgan, 104-sonli yo‘nalish bo‘ylab harakatlanadigan avtobus bilan sodir bo‘lgan.
Haydovchi S.A avtobusni Sergeli tumani “Yangi Sergeli” ko‘chasi bo‘ylab boshqarib ketayogan vaqtida, piyodalarning o‘tishi uchun mo‘ljallangan tartibga solinmagan piyodalar o‘tish joyidan yo‘lni kesib o‘tayotgan ona-bolaga yo‘l bermasdan, piyodalarning hayotiga xavf tug‘dirib harakatlanishi oqibatida piyodaning qo‘lida bo‘lgan telefoni va boshqa buyumlari qo‘lidan tushib ketish holati kuzatilgan.
Ushbu qoidabuzarlik ijtimoiy tarmoqlarda keng tarqalib, tarmoq foydalanuvchilari orasida norozilikka sabab bo‘ldi.
Sodir etilgan holat “Toshshahartransxizmat” AJ Boshqaruv raisi o‘rinbosari, Harakat xavfsizligini nazorat qilish boshqarmasi, “12-Avtobus saroyi” rahbariyati va mas’ullari hamda IIBB YHXB xodimlari ishtirokida tanqidiy muhokama qilingan. Haydovchi A.S ishdan olingan.
Shuningdek, mazkur holat Toshkent shahar IIBB YHXB xodimlari tomonidan o‘rnatilgan tartibda rasmiylashtirilgan.
