Toshkentda sun’iy yomg‘ir yog‘diriladi
2027-yil 1-oktyabrgacha namlik past bo‘lgan hududlarga sun’iy yomg‘ir yog‘dirish uchun kerakli asbob-uskunalar o‘rnatiladi.
Toshkent shahri havosini yaxshilash maqsadida, poytaxt va Toshkent viloyatida sun’iy yomg‘ir yog‘diriladi. Bu haqda Prezidenting havo sifatini yaxshilashga oid farmonida belgilandi.
Qayd etilishicha, O‘zbekistonda sun’iy yomg‘ir yog‘dirish va sun’iy shamol texnologiyasini bosqichma-bosqich joriy qilish choralari ko‘riladi. Buning uchun ijobiy sinovdan o‘tgan xorijiy tajriba o‘rganib chiqiladi.
Farmonga muvofiq, Ekologiya qo‘mitasi, Fanlar akademiyasi va Oliy ta’lim vazirligiga shunday topshiriq berildi.
Unga ko‘ra, 2027-yil 1-oktyabrga qadar poytaxtning atmosfera havosini yaxshilash maqsadida Toshkent shahri va Toshkent viloyatida namlik past bo‘lgan hududga sun’iy yomg‘ir yog‘dirish uchun kerakli asbob-uskunalar o‘rnatiladi.
Mazkur choralar uchun mablag‘ Umummilliy ekologik muammolarni bartaraf etish davlat maqsadli jamg‘armasidan ajratiladi.
Sun’iy yomg‘ir texnologiyasini joriy etish avvalroq 2026 yilgi davlat dasturiga ham kiritilgan edi.
Dasturda 2026-yil 1-martdan boshlab amaliy pilot loyihani ishlab chiqish, pilot tajribalar doirasida kamida 3–5 ta amaliy sinov o‘tkazish, bu orqali yog‘ingarchilik o‘zgarishi tabiiy fonga nisbatan 10–20 foizga o‘sishini ta’minlash ko‘zda tutilgan.
