Toshkentdagi Botanika bog‘ida 1-apreldan velosiped va samokatlar harakati to‘xtatiladi
Bog‘ ma’muriyati bunga tashrif buyuruvchilarning yiqilishi va jarohat olishi bilan bog‘liq holatlar ko‘payganini sabab qilib ko‘rsatdi.
Toshkent Botanika bog‘i ma’muriyati tashrif buyuruvchilar xavfsizligini ta’minlash maqsadida bog‘ hududida velosiped va samokatlarda harakatlanishni taqiqlash qarorini e’lon qildi.
Bog‘ ma’muriyati xabariga ko‘ra, so‘nggi vaqtlarda bog‘ hududida velosiped va samokatlarda harakatlanish paytida fuqarolarning yiqilishi va turli darajadagi tan jarohatlari bilan bog‘liq holatlar ko‘paygan.
Bundan tashqari, tashrif buyuruvchilardan ham ushbu masala bo‘yicha ko‘p murojaat va takliflar kelib tushgani qayd etilgan.
Shu sababli, Ilmiy kengashning qarori va tashrif buyuruvchilarning ko‘p murojaatlari asosida 2026-yil 1-apreldan boshlab Botanika bog‘i hududida barcha turdagi velosiped va samokatlarda harakatlanish to‘xtatiladi.
Ma’muriyat ta’kidlashicha, ushbu chora bog‘da xavfsiz, tinch va osuda piyoda sayr qilish muhitini yaratish, tabiat go‘zalligidan xotirjam bahra olish imkonini saqlash maqsadida amalga oshirilmoqda.
Bog‘ rahbariyati tashrif buyuruvchilardan ushbu tartibga rioya qilish va o‘zlarining hamda atrofdagilarning xavfsizligiga e’tibor berishni so‘radi.
